Tamíltígrar segjast vilja virða vopnahlé

Tamíltígrar í Sri Lanka hafa sent frá sér yfirlýsingu þar sem þeir biðja liðsmenn sína um að virða vopnahlé frá árinu 2002. Ofbeldi hefur farið stigvaxandi á eyjunni undanfarinn mánuð en nú segjast skæruliðasamtökin vilja binda enda á ofbeldi auk þess sem þau segjast munu tryggja öryggi norrænna friðargæsluliða.

700 manns, þar af helmingurinn almennir borgarar hafa látið lífið í átökum á eyjunni síðan um áramót. Síðan barátta Tamíla fyrir sjálfstæðu ríki byrjaði fyrir tveimur áratugum hafa um það bil 65 þúsund manns látið lífið, bæði Singalar á suðurhluta eyjunnar og Tamílar sem eiga rætur að rekja til nyrðri hluta hennar.