Charles Taylor loks fyrir dómstól

Charles Taylor, fyrrverandi einræðisherra í Líberíu, er nú á leið til Hollands þar sem réttað verður yfir honum. Hann er ákærður fyrir stríðsglæpi í tíu ára borgarastríði í nágrannalandinu Sierra Leone.

Hollendingar samþykktu að halda réttarhöldin yfir Taylor með því skilyrði að hann yrði sendur annað til fangavistar. Í síðustu viku tilkynntu Bretar að þeir gætu hýst hann í fangelsum sínum og var þá ekkert lengur til fyrirstöðu fyrir því að réttarhöldin yfir honum gætu hafist.

Réttarhöldin verða haldin í húsakynnum stríðsglæpadómstólsins í Haag en það verða lögfræðingar og dómarar frá Sierra Leone sem fara með málið. Ákveðið var að færa réttarhöldin frá Sierra Leone til þess að stofna stöðugleika í landinu ekki í hættu.

Taylor lék lykilhlutverk í borgarastríðinu í Sierra Leone með því að sjá skæruliðahópum þar fyrir vopnum og selja fyrir þá demanta. Hann flúði til Nígeríu árið 2003 eftir að honum var steypt af stóli en var handtekinn og framseldur nú í mars síðastliðnum.