Tíminn að renna út

Gríðarlegir kuldar á skjálftasvæðunum í Pakistan gera hjálparstarfi erfitt fyrir. Útlit er fyrir að einungis helmingur þeirra, sem misstu heimili sín í hamförunum, fái tjald til að gista í. Tíminn sem hjálparstarfsmenn hafa á skjálftasvæðunum í Pakistan er nú afar naumur. Vetur er innan seilingar á svæðinu við Himalaya-fjöllin og það þýðir að aðstæður fara versnandi dag frá degi, enda gríðarlegur kuldar í fjöllunum. Það gerir hjálparstarfi enn erfiðara fyrir. Samgöngur eru víða úr skorðum þar sem vegir hafa farið í sundur og brýr brotnað. Jan van de Moortele, fulltrúi neyðarhjálpar Sameinuðu þjóðanna í Pakistan, segir útlitið framundan svart, ef ekki tekst að hraða hjálparstarfi og aðgerðum á skjálftasvæðunum. Talið er að tæplega áttatíu þúsund manns hafi látið lífið í jarðskjálftanum sem reið yfir fyrir tveimur vikum og að þrjár milljónir manna hafi misst heimili sín. Kofi Annan, framkvæmdastjóri Sameinuðu þjóðanna, hefur skorað á allar aðildarþjóðir samtakanna að leggja sitt af mörkum til hjálparstarfsins. Talið er að um 200 þúsund tjöld verði komin til skjálftasvæðanna á næstu dögum, en það dugar þó einungis til þess að hýsa um helming þeirra, sem misstu heimili sín. Tveir Íslendingar eru á leið til hjálparstarfa í Pakistan. Alþjóða Rauði krossinn hefur sent Sólveigu Ólafsdóttur sendifulltrúa til hjálparstarfa á hamfarasvæðunum og er hún væntanleg til Islamabad á sunnudag. Þá heldur Jón Hafsteinsson, slökkviliðs- og sjúkraflutningamaður, áleiðis til Pakistan í byrjun næstu viku þar sem hann mun starfa við sjúkraflutninga á vegum Alþjóða Rauða krossins. Áætlað er að hann verði að störfum til 20. desember. Hann hefur áður starfað fyrir Alþjóða Rauða krossinn í Kosovo og Albaníu árið 1999 þar sem hann flutti mat og önnur hjálpargögn.