Vill reka Írana úr SÞ vegna ummæla Íransforseta

Shimon Peres, varaforsætisráðherra Ísraels, hefur farið fram á það að Írönum verði vísað úr Sameinuðu þjóðunum vegna ummæla forseta Írans um að þurrka ætti Ísrael út af landakortinu. Stjórnir verstrænna ríkja stíga nú fram hver af annarri til þess að fordæma orðin.

Mahmoud Ahmadinejad, forseti Írans, lét orðin falla á fundi í Teheran sem hafði yfirskriftina "Heimurinn án síonisma" og sagði enn fremur að hver sá sem skrifaði undir viðurkenningu á Ísraelsríki hefði skrifað undir uppgjöf hins íslamska heims.

Shimon Peres, varaforsætisráðherra Ísraels, segir að slík ummæli eigi ekki að líðast í heiminum í dag og hvetur til þess að Írönum verði útskúfað úr Sameinuðu þjóðunum vegna málsins. Aðspurður útilokar hann ekki að sækjast eftir umboði til að fara fram á það. Þá hafa yfirvöld í Bretlandi, Frakklandi, á Spáni og í Kanada öll kallað á sendiherra Írans í löndum sínum og krafist skýringa á ummælunum.

Íran hefur neitað að viðurkenna Ísraelsríki og styður aðgerðir uppreisnarhópa Palestínumanna, eins og Íslamska jihad sem lýst hefur yfir ábyrgð á sjálfsmorðsárás í Ísrael í gær sem kostaði fimm manns lífið. Þá hafa samskipti Vesturlanda og Írans stirnað nokkuð eftir að harðlínumaðurinn Ahmadinejad tók við embætti forseta fyrr á árinu en helsta deiluefnið er kjarnorkuáætlun Írana sem Bandaríkjamenn segja yfirvarp til að framleiða kjarnavopn.