Vopnahlé Ísraels og Paletínu í uppnámi

Minnst fimm týndu lífi og um þrjátíu særðust í sjálfsmorðsprengjuárás í strandbænum Hadera í Ísrael í dag. Íslömsku samtökin Jíhad hafa lýst verknaðinum á hendur sér.

Skömmu eftir að Palestínumaður sprengdi sjálfan sig í loft upp á markaði í miðbæ Hadera, lýstu íslömsku samtökin Jíhad ábyrgð á verknaðinum og sögðust vera að hefna fyrir morð á einum af leiðtoga sínum á Vesturbakkanum fyrir skemmstu.

Mikill eyðilegging blasti við eftir sprenginguna og ríkti mikil ringlureið á staðnum, þar sem fjölmenni var á markaðnum. Yfirvöld í Ísrael sögðu þetta vera grimmdarverk gegn Ísraelsmönnum og að því yrði svarað. Seab Erekat, fulltrúi heimastjórnar Palestínu, fordæmdi árásina og skoraði á bæði ísraelsmenn og Palestínumenn að fara ekki aftur í sama far ofbeldis og átaka.

Þetta er fyrsta sjálfsmorðsárásin í Ísrael síðan í ágúst, en ástandið á Gaza og á Vesturbakkanum hefur verið eldfimt undanfarið og er átta mánaða vopnahlé Ísraels og Palestínu í uppnámi. Árásin þykir draga úr vonum manna um að hægt verði að blása nýju lífi í friðarviðræður á svæðinu.