Skera upp herör gegn grimmilegri meðferð á dýrum

Yfirvöld í Róm á Ítalíu hafa skorið upp herör gegn kærulausum gæludýraeigendum og -seljendum og hafa sett margs konar reglur til þess að koma í veg fyrir grimmilega meðferð á dýrum.

Meðal þess sem bannað verður í borginni er að skilja dýr eftir í bílum í miklum hita, að hafa þau til sýnis í búðargluggum og að stýfa skott og eyru dýranna, en við því liggur allt að 35 þúsund króna sekt. Þá verða þeir hundaeigendur sem ekki viðra hundana sína sektaðir og kringlótt gullfiskabúr bönnuð þar sem talið er að þau blindi fiska.

Ekki er ljóst hvernig borgaryfirvöld hyggjast framfylgja reglunum en dýraverndunarsamtök í borginni hafa þó lofað þeim liðsinni sínu.