Vilja skjóta kóalabirni

Kóalabirnir og kengúrur eru sjálfsagt þekktustu dýrategundir Ástralíu. Íbúar Kengúrueyju hafa þó fengið nóg af kóalabjörnum og krefjast þess að fá að skjóta þá.  Kengúrueyja er við suðurströnd Ástralíu, skammt frá borginni Adelaide. Þar er fjölbreytt dýralíf en kóalabirnir hafa fjölgað sér afar hratt á eyjunni - fjöldi þeirra hefur tvöfaldast á fimm ára fresti undanfarið. Lengi hefur verið deilt um hvað eigi að gera í þessari offjölgun bjarnanna en íbúarnir vilja helst fá að skjóta þá. Dýravinir mega hins vegar ekki til þess hugsa að þúsundir þessara fallegu dýra verði skotin á færi og hafa barist gegn öllum slíkum fyrirætlunum. Þeir eru hins vegar upp á kant við umhverfissinna sem segja kóalabirnina smám saman vera að eyða upp gúmmítrjánum á eyjunni, sem gæti haft gríðarleg áhrif á bæði fuglalíf og skordýr sem lifa á trjánum. Áströlsk stjórnvöld eru líka hikandi í sinni afstöðu og óttast að það skaði ímynd landsins ef leyft verði að skjóta kóalabirnina sem eru nokkurs konar tákn landsins. Átak var gert fyrir nokkrum árum þar sem 4000 birnir voru geldir en nú eru þeir veiddir einn og einn og sendir til meginlandsins 20-30 saman. Það hefur hins vegar lítið að segja til að draga úr offjölgun. Viðurlögin við að skjóta kóalabjörn eru allt að tveggja ára fangelsisdómur en íbúar Kengúrueyju eru víst farnir að láta það sem vind um eyru þjóta og skjóta þá samt, með þeim rökum að þeir séu plága.