117 taldir af eftir flugslys

Nígería Boeing-þota í eigu nígerísks flugfélags fórst í fyrrakvöld með 117 manns skömmu eftir flugtak frá borginni Lagos. Afar misvísandi fréttir bárust af slysinu framan af gærdeginum. Þotan, sem var af tegundinni Boeing 737 og var í eigu nígeríska flugfélagsins Bellview Airlines, var á leið frá Lagos, stærstu borg landsins, til höfuðborgarinnar Abuja.

Skömmu eftir flugtak í fyrrakvöld hvarf vélin af ratsjá og tóku þá þegar grunsemdir að vakna um að eitthvað hefði komið fyrir. Framan af gærdeginum voru fregnir afar óljósar um hvar vélin hefði farist og hversu margir hefðu látist í slysinu.

Í fyrstu var talið að þotan hefði brotlent nærri Kishi í Oyo-héraði, 400 kílómetra frá Lagos, og fimmtíu farþegar hefðu komist lífs af. Þær fregnir voru síðar dregnar til baka þegar sjónvarpsfréttamenn sögðust hafa fundið flakið við þorpið Lissa í Ogun-héraði, 250 kílómetra frá Lagos.

BBC hefur eftir starfsmanni Rauða krossins á vettvangi að flakið hafi staðið í ljósum logum og útilokað virtist að nokkur hefði lifað slysið af. "Flugvélin var gjörsamlega í rúst, flakið hafði dreifst út um allt." Alls voru 117 um borð, 111 farþegar auk sex manna áhafnar. Fljótlega eftir að tíðindin spurðust út fylltist flugvöllurinn í Lagos af fólki í leit að upplýsingum um afdrif ástvina sinna. Þar voru jafnframt fulltrúar sendiráða sem vildu ganga úr skugga um hvort landar þeirra hefðu verið innanborðs.

Nígerískir embættismenn sögðust í gær ekki hafa neinar tilgátur um hver orsök slyssins væri þar sem flugritar vélarinnar væru ófundnir. Aðspurðir kváðust þeir ekki geta svarað hvort hryðjuverk hefði verið framið. Bellview Airlines þykir eitt af öruggustu flugfélögum Nígeríu en auðugir kaupsýslumenn og erlendir erindrekar eru á meðal helstu viðskiptavina þess.

Engin flugslys hafa orðið í ríflega tíu ára sögu þess. Flugöryggi er aftur á móti afar ábótavant í Nígeríu, og er ekki lengra en mánuður síðan þota flugfélagsins Air France ók inn í kúahjörð á flugbrautinni í Port Harcourt þegar hún kom inn til lendingar en enginn slasaðist. Árið 2002 fórst flugvél nærri borginni Kano og með henni 150 manns.