Treystir á stuðning jaðarflokka til hægri

Kazimierz Marcinkiewicz sór á mánudag embættiseið sem nýr forsætisráðherra Póllands. Hann fer fyrir minnihlutastjórn íhaldsflokksins Laga og réttlætis (PiS). Aleksander Kwasniewski, fráfarandi forseti Póllands, tók embættiseiðinn af Marcinkiewicz í forsetahöllinni í Varsjá. Þar var síðan nýja ríkisstjórnin, sem skipuð er sautján ráherrum, sett í embætti.

Nokkrir ráðherrar eru ekki úr flokki Marcinkiewicz, en tilgangurinn með því er að breikka stuðning við hana á þingi. Lög og réttlæti hefur 155 af 460 fulltrúum í neðri deild pólska þingsins, en flokkurinn greip til þess ráðs að mynda minnihlutastjórn eftir að viðræður um myndun meirihlutastjórnar með frjálshyggjuflokknum Borgaravettvangi fóru út um þúfur í síðustu viku. Stjórnin þarf að standast atkvæðagreiðslu um traustsyfirlýsingu á þingi þann 10. nóvember.

Marcinkiewicz sagðist áfram myndi reyna að afla stuðnings Borgaravettvangs og valið á ráðherrum virðist til þess fallið að ýta undir það. Þannig er til dæmis utanríkisráðherrann Stefan Meller ekki í neinum flokki, en hann var sendiherra Póllands í Moskvu. En það eru þrír flokkar á hægri jaðrinum; Sjálfsvörn (Samoobrona), Bændaflokkurinn og Pólska fjölskyldufylkingin - sem væntanlega munu standa saman um að verja minnihlutastjórnina falli. Donald Tusk, leiðtogi Borgaravettvangs, gagnrýndi Lög og réttlæti fyrir að velja að gera "Sjálfsvörn" hægripopúlistans Andrzej Lepper að bandamanni sínum.