Lentu undir skriðdreka

Hjónin Knut og Elise Okkenhaug prísuðu sig sæl að komast heil frá því er skriðdreka var ekið yfir bíl þeirra á miðvikudagskvöld. Þau voru á leið heim af skíðasvæði í Norður-Þrændalögum þegar þau urðu þess var að Leopard-skriðdreki norska hersins kom brunandi á móti þeim. Knut stýrði bíl þeirra hjóna eins langt út í kant og hægt var, alveg upp að háum snjóruðningnum. En það dugði ekki. "Þá skreið skriðdrekinn yfir vinstri hlið húddsins, svo yfir framrúðuna og þakið, um hálfan metra inn á bílinn. Sá sem stýrði skriðdrekanum sá okkur greinilega ekki," hafði Aftenposten eftir bílstjóranum, sem komst hjá því að kremjast undir með því að halla sér eins og hann gat yfir í farþegahliðina. Eftir að skriðdrekinn var farinn hjá sátu hjónin föst í flakinu uns rúta full af hælisleitendum ók hjá. Þeir drógu flakið upp á veg og losuðu hjónin úr því. Skriðdrekinn var á fjölþjóðlegri heræfingu sem nú stendur yfir á svæðinu.