Fimm milljónir enn án rafmagns

Fimm milljónir manna eru enn án rafmagns í Flórída eftir fellibylinn Wilmu. Hvarvetna um fylkið hafa myndast mörg hundruð metra biðraðir fyrir utan verslanir og þjónustumiðstöðvar þar sem fólk sækist eftir vatni, mat og öðrum nauðsynjum.

Víða er enn lokað og götur eru uppfullar af drasli sem fylgdi Wilmu. Í Cancun í Mexíkó gætir áhrifa Wilmu ekki síður en í Flórída. Þar bíða tugþúsundir ferðamanna eftir að komast heim og mikil ringulreið ríkir á flugvöllum og öðrum samgöngumiðstöðvum.

Enn einn hitabeltisstormurinn er nú að myndast í Karíbahafinu. Stormurinn Beta stefnir nú í átt að Níkaragúa og þar hefur verið gefin út viðvörun og gripið til varúðarráðstafana.