Ölvaðir elgir vekja ugg

Yfirvöld í Þelamörk hvetja fólk til að fara gætilega þar sem ölvaðir elgir gætu verið á ferli. Ávaxtaspretta í Noregi var góð þetta sumarið en þar sem vetrað hefur snemma hafa epli og ber skemmst vegna gerjunar og áfengi myndast í þeim sem elgirnir háma í sig með bestu lyst.

"Þetta er í fyrsta sinn sem ég hef heyrt um fulla elgi en ég reikna með að þeir hagi sér ölvaðir eins og við mannfólkið - sumir eru meinlausir en aðrir viðskotaillir," hefur dagblaðið Aftenposten eftir Paul Stamberg dýralækni í Kristjánssandi.