Hafði í hyggju að eitra vatnið

Saksóknarar í Baden-Württemberg gruna bónda nokkurn í ríkinu um að hafa ætlað að eitra Boden-vatn sem er á landamærum Þýskalands, Sviss og Austur­ríkis. Kafarar fundu í síðustu viku opna geyma á 70 metra dýpi í vatninu, 300 metra frá ströndu þess, og leikur grunur á að þeir hafi verið fylltir plöntueitrinu Atrazine.

Efnagreining stendur yfir en á meðan leita kafararnir að fleiri tönkum. Boden-vatn er helsta vatnsból 4,5 milljóna manna sem búa í Suður-Þýskalandi, Austurríki og Sviss en Karl Franz, talsmaður umhverfisráðuneytisins í Baden-Württemberg, segir þeim engin hætta búin. "Það er engin ástæða til skelfingar."

Otto Röding saksóknari greindi svo frá því í gær að bóndi sem byggi í nágrenni Ravensburg væri grunaður um að hafa komið eitrinu fyrir en hann er sagður hafa hótað slíku fyrir nokkrum vikum. Ekki fylgdi sögunni hvers vegna bóndinn vildi valda slíkum umhverfisspjöllum, en að sögn lögreglunnar krafðist hann þess að fjölmiðlar yrðu látnir vita af hótununum.

Yfirvöld urðu ekki við kröfum mannsins en ákváðu í staðinn að fylgjast grannt með öllum þeim sem freistuðu þess að kaupa illgresis- og skordýraeitur í grunsamlega miklum mæli.