Hóf fíl á loft með hugarorkunni

Hugleiðslumeistarinn og Íslandsvinurinn Sri Chinmoy er ekki dauður úr öllum æðum þrátt fyrir að vera kominn vel á áttræðisaldur. Kappinn, sem er frægur fyrir lyftur sínar, stóð fyrr í þessum mánuði fyrir þriggja daga friðarhátíð í New York en á þeim tíma lyfti hann nánast öllu sem hönd á festi, mönnum, dýrum og dauðum hlutum, alls ríflega 130 tonnum. Meðal þeirra sem Sri Chinmoy lyfti á hátíðinni voru níu Ólympíuverðlaunahafar. Rússneska langstökksdrottningin Tatyana Lebedeva fékk sérstaka meðferð, hún sat á baki fjögurra tonna fíls sem Chinmoy snaraði á loft. Þessu til viðbótar lyfti hann bifreið, 1.500 bókum og söngkonunni Robertu Flack á meðan hún lék syrpu af sínum vinsælustu lögum á níðþungan flygil sinn. Lyftingarnar eru liður í vitundarvakningu Chinmoys um bræðralag og frið en frá árinu 1988 hefur hann hafið yfir 7.000 manns á loft í viðurkenningarskyni. Að sögn Eymundar Matthíassonar, forsvarsmanns Sri Chinmoy miðstöðvarinnar á Íslandi, gerir meistarinn þetta til að hnykkja á einingu mannkyns. Þannig kom hann hingað til lands í fyrra og lyfti tólf alþingismönnum og árið 1989 fékk Steingrímur Hermannsson, þáverandi forsætisráðherra, svipaða meðhöndlun. Sri Chinmoy er 73 ára gamall og af útliti hans að dæma er erfitt að ímynda sér að kraftajötunn sé þar á ferð. Eymundur segir hins vegar að þessi aldni spekingur virki hugarorkuna með þessum árangri. "Hann leggur áherslu á að þetta sé ekki bara eitthvert skemmtiatriði heldur sé grunnurinn innri vinna, hugleiðsla og einbeiting og það sé forsenda þess sem þú getur gert út á við," segir hann. Að mati Eymundar er útilokað að brögð séu í tafli. "Þarna stóðu menn eins og vaxtarræktartröllið Bill Pearl við hliðina á honum og sáu að enginn maðkur var í mysunni. Pearl sagði að það sem hann hefði orðið vitni að væri engum manni fært, sama á hvaða aldri hann væri." Ekki er útilokað að kappinn heimsæki frostbitna Frónverja á næstunni en Eymundur vill þó engu lofa. "Það er erfitt að fullyrða nokkuð, þetta verður bara að koma í ljós."