Hópnauðganir í Darfur

Hermenn í Darfur í Súdan nota hópnauðganir sem vopn í baráttu sinni að sögn mannréttindasamtakanna Amnesty International. Talið er að milljón manns hafi flúið heimili sín. Ástandið í Darfur í Súdan fer versnandi og alþjóðasamfélagið hefur engan veginn undan í að aðstoða nauðstadda. Hjálparsamtök gagnrýna alþjóðasamfélagið fyrir aðgerðarleysi en talið er að þúsundir muni deyja úr hungri og sjúkdómum en yfir milljón manns hafa flúið heimili sín og hafast meðal annars við í búðum við landamæri Thads. Hjálparstofnanir eiga erfitt með að nálgast nauðstadda vegna átaka sem geisa á svæðinu og ekki hefur borist nægjanlegt fé til að hægt sé að takast almennilega á við vandann. Friðarviðræður milli stjórnvalda og uppreisnarmanna frá Darfur fóru út um þúfur um helgina og er ekki búist við því að þeir setjist að samningaborðinu aftur nema þeir verði beinlínis neyddir til þess. Mannréttindasamtökin Amnesty International hafa vakið athygli á því að hermenn noti hópnauðganir í baráttu sinni og hafi stúlkur niður í átta ára og konur upp í áttrætt mátt þola nauðganir og kynferðislegt ofbeldi. Nauðganirnar eru gerðar frammi fyrir ættingjum og heilu ættbálkunum til þess að niðurlægja hópinn. Í flóttamannabúðum eru konur ekki öruggar og hafa stjórnarhermenn tekið þátt í nauðgunum þar. Talið er að nauðganirnar séu liður í þjóðhreinsun stjórnarliða og beinist gegn konum sem ekki eru arabískar. Tugir þúsunda hafa látið lífið í Darfur en stjórnvöld neita því að stjórnarhermenn hafi stundað hópnauðganir á svæðinu