Ríkið kemur ekki að deilunni

Menntamálaráðherra ítrekaði það á Alþingi í dag að ríkisstjórnin ætlaði ekki að blanda sér í kennaradeiluna og sagðist ekki trúa öðru en að deiluaðilar næðu saman.Staðan í kennaradeilunni kom til umræðu í fyrirspurnartíma þegar Björgvin Sigurðsson spurði Þorgerði Katrínu Gunnarsdóttir, menntamálaráðherra, hvort ríkisstjórnin hygðist koma að málinu. Svarið var skýrt nei. Þorgerður sagði að ríkisvaldið myndi ekki koma að deiluni nú frekar en verið hefði. Sveitarfélögin hefðu þegar leyst sambærilega deilu tvisvar án atbeina ríkisvalds og ættu að geta gert það nú. Björgvin sagði svörin hryggja sig. Sveitarfélögin gætu ekki leyst deiluna vegna rangrar tekjuskiptingar ríkis og sveitarfélaga. Björgvin sagði menntamálaráðherra það í lófa lagið að koma með jákvætt innslag í deiluna og hann harmaði það ef ríkisvaldið ætlaði ekkert að gera til þess að liðka fyrir deilunni.Ráðherra kallaði þetta pólitíska tækifærismennsku og sagði samfylkinguna tala tungum tveim. Hún segði eitt í Ráðhúsinu en annað á Alþingi. Hún sagði að væri eitthvað óuppgert milli sveitarfélaga og ríkisvalds ætti ekki að gera það upp í kringum kjaradeilu, það væri einfaldlega rangur vettvangur.