Tveir al-Kaída menn drepnir

Tveir menn, grunaðir um aðild að hryðjuverkasamtökunum al-Kaída, féllu í skotbardaga í Ríad í Sádi-Arabíu í nótt. Í yfirlýsingu frá innanríkisráðuneyti landsins segir að þrír aðrir grunaðir hryðjuverkamenn hafi særst en setið var um heimili Saleh al-Awfi sem er talinn leiðtogi samtakanna í Sádi-Arabíu. Ekki er ljóst hvort hann er meðal hinna látnu eða særðu. Þrír lögreglumenn særðust einnig í átökunum sem brutust út í norðurhluta Ríadborgar, í hverfinu King Fadh, þegar öryggissveitir voru að rannsaka svæði þar sem grunur lék á að stuðningsmenn al-Kaída héldu til.