Fundað um landnemabyggðir

Ísraelska ríkisstjórnin situr nú á fundi til að ákveða hvort styðja eigi áætlanir Ariels Sharons forsætisráðherra um að loka landnemabyggðum gyðinga á Gaza-svæðinu, en það er eitt af mestu deilumálum Palestínumanna og Ísraela.

Horfið frá landnemabyggðum

Ríkisstjórn Ísraels samþykkti á fundi sínum í dag áætlun um að Ísraelar hverfi frá landnemabyggðum á Gaza-svæðinu. Ariel Sharon, forsætisráðherra Ísraels, hefur barist fyrir stuðningi við þessa áætlun, en hún er ákaflega mikilvæg varðandi friðarhorfur fyrir botni Miðjarðarhafs, þar sem landnemabyggðirnar hafa verið þyrnir í augum Palestínumanna.

Átök sjíta og súnníta á Indlandi

Til átaka kom á milli sjíta og súnníta í héraðinu Uttar Pradesh í norðurhluta Indlands í dag með þeim afleiðingum að þrír létust og 13 særðust. Deilurnar milli trúarhópanna snerust um það hvaða leið ganga á vegum sjítanna ætti að fara, en þeir halda um Ashura-trúarhátíðina hátíðlega um þessar mundir eins og sjítar í öðrum löndum.

Fleiri finnast látnir í Bangladess

Nú hafa 74 fundist látnir og rúmlega 120 er enn saknað eftir að áætlunarferja með um 200 manns sökk á fljótinu Buriganga í suðurhluta Bangladess í dag. Ferjan var á leiðinni frá borginni Dhaka þegar hún lenti óveðri með þeim með afleiðingum að henni hvolfdi og í kjölfarið sökk hún.

Fíll í dýragarði drepur mann

Starfsmaður í dýragarðinum í Vínarborg í Austurríki lést í dag eftir að fíll í garðinum stakk hann á hol. Starfsmaðurinn var að sprauta vatni á fílinn þegar hann trylltist og rak aðra skögultönnina í gegnum maga mannsins. Þetta er ekki í fyrsta sinn sem dýr í garðinum verður manni að bana því fyrir þremur árum réðst jagúar á starfsmann og drap hann frammi fyrir gestum í garðinum.

Sagðir ræða um frið

Bandarískir erindrekar og yfirmenn í leyniþjónustu Bandaríkjanna eiga í leynilegum viðræðum við uppreisnarmenn súnníta í Írak til þess að reyna að binda enda á árásir þeirra í landinu. Frá þessu greinir tímaritið Time í dag og hefur eftir ónafngreindum heimildarmönnum í Washington og Írak.

Manntjón í snjóflóðum á Indlandi

Mikið fannfergi í Kasmír-héraði á Indlandi hefur kostað 21 mann lífið og 28 er saknað, en þar hafa snjóflóð fallið á afskekkt þorp. Ekki hefur snjóað jafnmikið í héraðinu í nær tvo áratugi og hafa margir bæir í Himalajadalnum verið einangraðir í þrjá daga þar sem vegir eru lokaðir og víða er rafmagns- og símasambandslaust.

Ísraelar hyggjast lengja múrinn

Ísraelska ríkisstjórnin samþykkti að lengja enn frekar aðskilnaðarmúr sinn á Vestubakkanum til þess að innlima Gush Etzion landnemabyggðirnar inn í Ísraelsríki. Þetta gerði hún um leið og ákveðið var að flytja gyðinga frá öllum landnemabyggðum á Gaza-svæðinu og litlum hluta byggða á Vesturbakkanum.

Dræm þátttaka í þjóðaratkvæði

Þátttaka í þjóðaratkvæðagreiðslu á Spáni um stjórnarskrá Evrópusambandsins virðist ætla að verða mjög dræm en samkvæmt Reuter-fréttastofunni hafði tæpur þriðjungur kosningabærra manna, 32,5 prósent, nýtt sér atkvæðisrétt sinn nú klukkan fimm.

12 ára í níu ára fangelsi

Tólf ára drengur í Ohio, Bryan Christopher Sturm, var á laugardag dæmdur í níu ára fangelsi fyrir að hafa myrt bæði frænku sína og ömmu. </font />

Vilja yfirráð í Asíu

Japanar eru eingöngu í samkrulli við Bandaríkjamenn með það að markmiði að ráða ríkjum í Asíu um alla framtíð að mati ríkisdagblaðs Norður-Kóreu sem vísar alfarið á bug að þörf sé á viðræðum um vopnaeign landsins.

Á reki í gúmbát í sjö vikur

Ástralska strandgæslan skýrði frá því um helgina að tekist hefði að bjarga þremur mönnum sem höfðu verið á reki í opnum gúmmíbát í alls sjö vikur.

Gyðingar yfirgefa Gaza í júlí

Ríkisstjórn Ísraels samþykkti á fundi í gær áætlun Ariels Sharon um brottflutning hermanna og gyðinga frá Gazasvæðinu og Vesturbakkanum. Brottflutningur mun hefjast í júlí næstkomandi

Óttast árásir á hjálparstarfsmenn

Allir þeir erlendu hjálparstarfsmenn sem að störfum eru í Indónesíu til aðstoðar þeim er urðu hvað verst úti eftir flóðbylgjuna í Indlandshafi eru í alvarlegri hættu því líklegt er að íslamskir ofsatrúarmenn séu að skipuleggja hryðjuverkaárás á þá fljótlega.

Páfi ávarpaði lýðinn í dag

Jóhannes Páll páfi annar virtist við ágæta heilsu þegar hann ávarpaði trúaða í dag í annað sinn eftir að hann útskrifaðist af sjúkrahúsi fyrir tíu dögum. Páfinn, sem er orðinn 84 ára, hélt stutta ræðu en talaði skýrri röddu. Hann þjáist af Parkinsonsveiki og er slæmur í mjöðm og hnjám. Hann var lagður inn á sjúkrahús vegna öndunarerfiðleika fyrir nokkrum vikum.

Líkur á samþykkt stjórnarskrár

Spánverjar greiddu í dag atkvæði um nýja stjórnarskrá Evrópusambandsins. Kosningaþátttaka var dræm en kannanir benda til að stjórnarskráin verði samþykkt.

Herteknum svæðum skilað

Ariel Sharon, forsætisráðherra Ísraels, fyrirskipaði í dag að landnemabyggðum gyðinga á Gaza-svæðinu og á fjórum stöðum á Vesturbakkanum yrði lokað. Það yrði í fyrsta sinn í sögu Ísraels sem hertekin svæði Palestínumanna yrðu yfirgefin.

Stjórnarskrá samþykkt á Spáni

Yfirgnæfandi meirihluti Spánverja samþykkti stjórnarskrá Evrópusambandsins í kosningum sem fram fóru í landinu í gær samkvæmt útgönguspám.

Heimurinn gleymi ekki fórnarlömbum

Það er mikilvægt að heimurinn gleymi ekki fórnarlömbum hamfaranna í Suðaustur-Asíu og aðstoði þau áfram við að koma lífi sínu á réttan kjöl, segja tveir fyrrverandi forsetar Bandaríkjanna sem eru í heimsókn á flóðasvæðunum.

Einn fórst í bílsprengjutilræði

Einn meðlimur íröksku öryggissveitanna fórst í morgun þegar bílsprengja sprakk í Bakúba-borg í norðurhluta Íraks. Tveir særðust. Árásir sem þessar eru orðnar nær daglegt brauð í Írak. Öfgahópar súnnímúslima í Írak réðu að minnsta kosti 27 sjítamúslima af dögum í gær og árásir súnníta fara vaxandi dag frá degi.

Clinton og Bush eldri safna fé

Tveir fyrrverandi forsetar Bandaríkjanna heimsóttu hamfarasvæðin í Suðaustur-Asíu í dag. Bill Clinton og George Bush eldri táruðust næstum þegar þeir ræddu við fréttamenn um taílensk börn sem misstu foreldra sína í flóðunum. Bush yngri valdi þá til að stýra fjáröflun til hjálpar fórnarlömbum hamfaranna.

Ákærur á hendur England mildaðar

Ákærur á hendur bandaríska hermanninum Lynndie England hafa verið mildaðar, en hún er sökuð um misþyrmingar á írökskum föngum í Abu Ghraib fangelsinu. Í stað þess að eiga yfir höfði sér tæplega fjörtíu ára fangelsisvist eru það rúm sextán ár nú. Saksóknari útskýrði ekki hvers vegna ákærunni hefði verið breytt.

Snarpur skjálfti við Indónesíu

Yfirborð sjávar við Indónesíu hækkaði um fjóra metra þegar jarðskjálfti varð á hafsvæðinu þar í kring í morgun. Skjálftinn mældist 6,5 á Richter.

Áframhaldandi árásir súnníta

Öfgahópar súnnímúslima í Írak halda áfram að ráða sjítamúslima af dögum og eru árásir sem snerta óbreytta borgara orðnar nær daglegt brauð í landinu.

Stefnir í skattastríð í Danmörku

Skattastríð er í uppsiglingu innan nýju dönsku ríkisstjórnarinnar, sem kynnt var í gær. Stuðningsflokkur stjórnarflokkanna tveggja ætlar ekki að styðja þá í að hrinda í framkvæmd einu af fyrstu kosningaloforðunum.

Ellefu látnir í árásum í Írak

Að minnsta kosti 11 hafa látist og 90 særst í sjálfsmorðsárásum og sprengingum í hverfum sjíta í Bagdad í dag, en Ashura-trúarhátíð þeirra nær hámarki í dag. Maður á mótorhjóli sprengdi sjálfan sig í loft upp við jarðarför í mosku sjíta í morgun með þeim afleiðingum að að fjórir létust og tæplega 39 særðust.

Fjarlægðu aukahöfuð af stúlku

Egypskum læknum tókst í dag að fjarlægja aukahöfuð af 10 mánaða gamalli stúlku en hún kom í heiminn með mjög sjaldgæfan fæðingargalla. Gallanum svipar til þess að síamstvíburar væru fastir saman á hausnum en í þessu tilviki er annar tvíburinn aðeins hausinn og gat hann brosað og deplað augum.

Fjölmenn mótmæli í Róm

Þúsundir Ítala gengu um götur Rómar í dag til þess að krefjast þess að ítölsku blaðakonunni Giuliönu Sgrena sem rænt var í Írak snemma í mánuðinum yrði sleppt. Sgrena starfaði fyrir dagblaðið Il Manifesto í Írak og var rænt 4. febrúar þegar hún var að taka viðtöl skammt frá háskólanum í Bagdad, en hún birtist á myndbandi sem sent var út fyrr í vikunni þar sem hún grátbað um að sér yrði hlíft og að Ítalir kölluðu her sinn heim frá Írak.

Sautján létust í strætósprengingu

Tala látinna í sprengingu í strætó í Bagdad í Írak fyrr í dag hefur hækkað úr fimm í sautján og þar að auki slasaðist 41. Strætóinn sprakk í loft upp við vegatálma nærri mosku sjíta í borginni. Þar með hafa tuttugu og þrír fallið í árásum uppreisnarmanna á sjíta í höfuðborginni , en Ashura, trúarhátíð þeirra, nær hámarki í dag.

Fundaði með Norður-Kóreumönnum

Fulltrúi Kínverja átti í dag fund með yfirvöldum í Norður-Kóreu til þess að reyna að fá þau til að hefja aftur viðræður um kjarnorkuvopnáætlun sína. Norður-Kóreumenn drógu sig út úr viðræðum sex ríkja um kjarnorkumál í Norður-Kóreu og lýstu um leið yfir að þeir ættu kjarnorkuvopn.

Alda sjálfsmorðsárása á hátíð

Alda sjálfsmorðsárása hélt áfram í Írak í dag um leið og ein mikilvægasta trúarhátíð sjíta náði hámarki. Tilraunir til að forðast blóðbað á hátíðinni hafa mistekist.

Wallström fer ekki fram

Margot Wallström hefur tilkynnt að hún muni ekki bjóða sig fram í þingkosningunum í Svíþjóð árið 2006, þar sem hún telur stöðu sína hjá Evrópusambandinu ekki bjóða upp á það, en hún er varaforseti framkvæmdastjórnar ESB.

Nærri 130 börn látin vegna kulda

Tæplega 130 afgönsk börn hafa látist úr kulda á síðustu vikum. Örvæntingarfullir foreldrar gefa börnunum sínum ópíum til að lina þjáningarnar, segir heilbrigðisráðherra landsins.

SÞ rannsakar morðið á Hariri

Kofi Annan, aðalritari Sameinuðu þjóðanna, ætlar að senda hóp sérfræðinga til Líbanons til að rannsaka morðið á Rafik Hariri, fyrrum forsætisráðherra landsins.

756 prestar áskaðir um misnotkun

Rómversk-kaþólsku kirkjunni í Bandaríkjunum bárust á síðasta ári 1.092 nýjar ásakanir um kynferðislega misnotkun presta á börnum.

Kosið um stjórnarskrá ESB

Þjóðaratkvæðagreiðsla um nýja stjórnarskrá Evrópusambandsins fer fram á Spáni í dag. Spánverjar verða þar með fyrsta þjóðin til að kjósa um stjórnarskrána en tíu aðrar þjóðir innan sambandsins hafa tilkynnt að þær ætli að bera hana undir þjóðaratkvæði.Ef eitt ríki neitar að staðfesta stjórnarskrána tekur hún ekki gildi.  

Norður-Kórea vill engar viðræður

Stjórnvöld í Norður-Kóreu útiloka nú tvíhliða viðræður við Bandaríkjastjórn um kjarnorkuætlun landsins. Kínverska fréttastofan Xinhua hafði þetta eftir embættismanni norður-kóreska utanríkisráðuneytisins í gær.

50 létust í sprengjuárásum

Að minnsta kosti 50 manns létust í sprengjuárásum uppreisnarmanna í Írak í gær þegar Ashoura, trúarhátíð sjía-múslíma, náði hámarki. Meira en hundrað manns særðust í árásunum. Talið er að súnní-múslímar hafi skipulagt árásirnar.

Flugvél með fallhlíf

Öruggasta einkaflugvél í heimi rennur í stríðum straumi út úr verksmiðjunni í Minnesota í Bandaríkjunum. Íslendingurinn Snorri Guðmundsson á þátt í hönnun vélarinnar sem er framleidd með fallhlíf fyrir alla vélina.

Þremur mönnum rænt í Írak

Tveim blaðamönnum frá Indónesíu var rænt í borginni Ramadi í Írak fyrr í vikunni. Talsmaður stjórnvalda í Írak greindi frá þessu í morgun. Bílstjóra blaðamannanna var einnig rænt sem og bílaleigubíl sem þeir höfðu á leigu.

Handtekin vegna bankaráns

Lögreglan á Írlandi handtók í gær sjö manns sem grunaðir eru um að hafa framið mesta bankarán í sögu Norður-Írlands fyrir tveim mánuðum. Nærri 300 milljónir króna fundust í híbýlum mannanna, en það er þó ekki nema brot af því sem stolið var.

Sonur Sharons sóttur til saka

Dómsmálaráðherra Ísraels ákvað í gær að höfða mál á hendur syni Ariels Sharons, forsætisráðherra Ísraels. Omri Sharon er gefið að sök að hafa sett á stofn fyrirtæki erlendis sem sendi síðan fjármagn í kosningasjóði föður hans. Þá er hann einnig sakaður um frekara bókhaldssvindl og meinsæri.

Björguðu þriggja marka dreng

Læknum í Bandaríkjunum hefur tekist að bjarga dreng sem vó aðeins þrjár merkur við fæðingu. Hjarta drengsins var á stærð við vínber þegar hann fæddist og þurfti að víxla hjartaslagæðum svo að hann myndi lifa af. Jafnlétt barn hefur aldrei áður lifað slíka aðgerð af.

Allir hópar verði í ríkisstjórn

Ibrahim al-Jaafari, sem talið er líklegt að verði forsætisráðherra Íraks, segir að í nýrri ríkisstjórn verði að vera fulltrúar allra helstu hópa í landinu. Jaafari fer fyrir bandalagi sjíta en hann segir að í ríkisstjórninni verði einnig Kúrdar og súnnítar þrátt fyrir að þeir síðarnefndu hafi nær ekkert fylgi hlotið í nýafstöðnum kosningum.

Sprengdi sig í loft upp í mosku

Sjálfsmorðsárásarmaður drap fjóra hið minnsta og særði tuttugu og tvo inni í mosku sjíta í suðurhluta Bagdad í morgun. Sjónarvottar segja að árásarmaðurinn hafi borið sprengjubelti um sig miðjan og kveikt í því þegar hann kom inn í moskuna. Sjítamúslimar fagna þessa dagana Ashura sem er mikilvæg trúarhátíð til minningar um píslarvætti barnabarns Múhameðs spámanns.