Framlög til þróunarsamvinnu við Srí Lanka þrefölduð

Fiskveiðifloti Srí-Lankamanna þurrkaðist nánast út í hamförunum á dögunum og tekið getur allt upp í áratug að rétta hag þjóðarinnar á ný. Ríkisstjórn Íslands hefur ákveðið að verja 75 milljónum króna til þróunarsamvinnu á Srí Lanka. </font /></b />

Ekki hægt að kjósa alls staðar

Það verður ekki hægt að kjósa alls staðar í Írak þann 30. janúar. Þetta sagði Iyad Allawi, forsætisráðherra bráðabirgðastjórnarinnar, í gær. Skiptir þá engu þótt fimmtíu þúsund hermönnum verði bætt við öryggissveitir Íraka fram að kosningunum.

Þrír látnir á Bretlandseyjum

Þrír hafa farist í miklu óveðri sem gekk inn á norðanverðar Bretlandseyjar í nótt. Víða hafa raflínur rofnað og eru tugir þúsunda manna án rafmagns og víða er varað við flóðahættu á Englandi, í Wales og Skotlandi. Veðurhamurinn náði líklega hámarki nú í morgun og fer vindhraðinn upp í fjörutíu metra á sekúndu.

Varað við aðgerðum uppreisnarmanna

Ríkisstjórn Indónesíu hefur ítrekað viðvaranir sínar um að hjálparstarfsmenn á Ache-héraði kunni að vera í hættu vegna aðgerða uppreisnarmanna. Þrátt fyrir að helsti hópur uppreisnarmanna í landinu segist ekki ætla að ráðast á hjálparstarfsmennina hafa þeim eigi að síður borist hótanir undanfarna daga.

Þjóðaratkvæði um stjórnarskrá ESB

Spænska þingið samþykkti í gær einróma að vísa stjórnarskrá Evrópusambandsins í þjóðaratkvæðagreiðslu. Spánverjar verða þar með fyrstir Evrópuþjóða til þess að greiða atkvæði um stjórnarskrána sem á að gera stofnanir Evrópusambandsins skilvirkari.

Kannabisefni í bíl og heima

Um hundrað grömm af kannabisefnum fundust hjá manni sem stöðvaður var á bíl sínum í vesturborginni undir kvöld í gær. Kannabisefni fundust í bílnum og síðan við húsleit heima hjá honum. Megninu hafði verið pakkað í litlar umbúðir eins og seldar eru á götunni og er maðurinn grunaður um að hafa ætlað að selja efnið.

Íslendingar og Færeyingar semja

Færeyingar og Íslendingar hafa gengið frá gagnkvæmum veiðiheimildum í lögsögum landanna. Færeyingar fá að halda áfram að veiða 5600 tonn af bolfiski í íslenskri lögsögu í ár eins og undanfarin og þá mega færeysk skip veiða ákveðið magn af uppsjávarfiski í íslenskri lögsögu og íslensk skip á móti í færeysku lögsögunni.

Hlupu uppi tölvuþjóf

Skjót viðbrögð lögreglunnar á Akureyri við boðum frá þjófavarnakerfi í verslun Office One í bænum urðu til þess að hún gómaði þjóf sem stolið hafði fjórum fartölvum að andvirði um níu hundruð þúsund krónur. Þegar lögregla kom á vettvang sást til þjófsins á harðahlaupum og tóku lögreglumenn þá líka til fótanna og eltu hann.

David Beckham til liðs við UNICEF

Nýskipaður velgjörðarsendiherra UNICEF, David Beckham, mun taka þátt í sjónvarpsherferð Barnahjálpar Sameinuðu þjóðanna til stuðnings fórnarlömbum flóðanna í löndunum við Indlandshaf.

Fyrstu frímerki ársins að koma út

Fyrstu frímerkin og fyrsta smáörkin sem Íslandspóstur gefur út á þessu ári koma út á morgun. Eyjar við Ísland eru myndefni á tveimur frímerkjum og eitt frímerki er gefið út til að minnast þess að 100 ár eru síðan skipulögð skógrækt hófst á Íslandi. Þá er gefin út smáörk í tilefni þess að safnhús Þjóðminjasafns Íslands hefur verið opnað að nýju.

85% landsmanna í þjóðkirkjunni

Um 85 prósent landsmanna eru skráð í þjóðkirkjuna, en það eru 6 prósentum færri en fyrir áratug. Á sama tíma hefur fjöldi þeirra sem standa utan trúfélaga nánast tvöfaldast.

Bakkavör leggur til níu milljónir

Starfsmenn Bakkavarar Group og félagið sjálft ætla að styrkja hjálparstarf á hamfarasvæðunum í Asíu um níu milljónir króna. Tvær og hálf milljón safnaðist meðal starfsmanna, félagið lagði fram jafn mikið á móti og ákveðið var að verja áætluðum kostnaði við árshátíðarhald starfsmanna líka til söfnunarinnar.

Útlán Íbúðlánasjóðs dragast saman

Útlán Íbúðalánasjóðs skreppa saman ansi hratt og engin aukning hefur orðið á útlánum sjóðsins þrátt fyrir rýmri lánaheimildir og samstarf við sparisjóði. Frá því bankarnir hófu innrás sína á íbúðalánamarkað hafa þeir lánað tæpum 90 prósentum, eða 103 milljörðum, meira til íbúðarkaupa en Íbúðalánasjóður.

Einn lést í árás á herjeppa á Gasa

Stefna hins nýja forseta Palestínu varð fyrir áfalli í morgun þegar palestínskir byssumenn gerðu ísraelskum herjeppa fyrirsát í grennd við landnemabyggð gyðinga á Gasaströndinni. Þeir drápu einn landnema og særðu þrjá hermenn.

Rannsókn enn í höndum Þjóðverja

Rannsókn á fíkniefnafundinum um borð í togaranum Hauki í Bremerhafen á fimmtudag er enn algerlega í höndum þýsku lögreglunnar og hefur enginn verið yfirheyrður vegna málsins hér á landi.

Eiturlyfjum smyglað í hundum

Fíkniefnabarónar í Kólumbíu eru farnir að nota gæludýr til þess að koma varningi sínum á milli landa. Fíkniefnunum er troðið inn í dýrin.

Enn óvíst með atvinnuleyfi

Engin svör fást hjá Vinnumálastofnun við því hvort gengið verði frá atvinnuleyfum í dag fyrir 54 Kínverja sem Impregilo hefur óskað eftir að ráða til starfa. Impregilo ætlar að sækja um leyfi fyrir að minnsta kosti 230 útlendinga.

Vilja að Annan sæti ábyrgð

Bandaríkjamenn hafa ítrekað kröfu sína um að Kofi Annan, framkvæmdastjóri Sameinuðu þjóðanna, verði dreginn til ábyrgðar fyrir stjórnleysið sem einkenndi framkvæmd Sameinuðu þjóðanna á samkomulaginu um að Írakar fengju að selja olíu fyrir mat og aðrar nauðsynjar.

Verð á mjólkurkvóta rýkur upp

Verð á mjólkurkvóta er rokið upp úr öllu valdi og íhuga ýmsir bændur að bregða búi og selja kvótann, en aðrir neyðast til þess. Lítri af varanlegum mjólkurkvóta kostaði 210 krónur í janúar í fyrra en er nú kominn upp í 355 krónur og hefur lítrinn því  hækkað um 145 krónur, sem er langt umfram allar hækkanir í landinu.

Umdeildar reglur bíða gildistöku

Umdeildar breytingar á reglum ferðaþjónustu fatlaðra aldraða taka ekki gildi fyrr en settar verða reglur um akstursþjónustu aldraðra, að sögn Bjarkar Vilhelmsdóttur borgarfulltrúa.

Koma sér fyrir á hættulegu svæði

Fórnarlömb flóðbylgjunnar á Srí Lanka eru nú að snúa aftur til síns heima, stjórnvöldum til mikils ama. Fólkið kemur sér á ný fyrir á svæði sem talið er stórhættulegt. Ofgnótt er af sumum neyðarvarningi en annan sárvantar.

Heilbrigðisráðherra selur aðgerðir

 Jón Kristjánsson, heilbrigðis- og tryggingamálaráðherra, hefur ákveðið að taka tilboði fjögurra heilbrigðisstofnana um kaup á tæplega 650 aðgerðum sérstaklega. Ákvörðun ráðherra er liður í að draga enn frekar úr bið eftir þessum aðgerðum. Heildarkostnaður er nær 90 milljónum króna.

Ekkert fararsnið á Alfreð

Alfreð Þorsteinsson, formaður borgarráðs, segir ekkert fararsnið á sér úr borgarpólitík. Hann blæs á þau sjónarmið samflokksmanna sinna í Framsóknarflokknum að tími sé kominn til að hann snúi sér að öðrum verkefnum og segir gagnrýnina eiga rætur að rekja til vonbrigða þeirra með eigin framgöngu.

Samstillt átak þarf til

Íbúðalánasjóður segir að með samstilltu átaki sveitarfélaga, sérstaklega á höfuðborgarsvæðinu, sé hægt að draga úr þrýstingi á íbúðaverð með aukinni lóðaúthlutun.

Áskoranir í gang

Aðstandendur söngleikjarins Hársins gáfu á dögunum ágóða sérstakrar aukasýningar Hársins til Landssöfnunarinnar "Neyðarhjálp úr norðri". KB banki tvöfaldaði framlag leikhússins og nam upphæðin 3,5 milljónum króna. Aðstandendur Hársins skora á aðstandendur Héra Hérasonar, sem nú er sýndur í Borgarleikhúsinu, að leggja söfnuninni lið.

Rasmussen hyggst boða til kosninga

Anders Fogh Rasmussen, forsætisráðherra Danmerkur, hyggst boðað til kosninga í næsta mánuði eða níu mánuðum á undan áæltun. Rasmussen mun vilja nýta þann meðbyr sem skoðanakannanir sýna að flokkur hans, Venstre, hafi nú.

Bera saman epli og appelsínur

Hallur Magnússon, sviðsstjóri hjá Íbúðalánasjóði, segir að greiningardeild Íslandsbanka beri saman epli og appelsínur, þegar hún segir að bankarnir hafi veitt 120 milljarða í verðtryggð íbúðalán en íbúðalánasjóður 17 milljarða frá því bankarnir hófu samkeppni við Íbúðalánasjóð í lok ágúst.

Álver Alcoa fari í umhverfismat

Álver Alcoa í Reyðarfirði þarf að fara í gegnum nýtt, sjálfstætt umhverfismat samkvæmt dómi Héraðsdóms Reykjavíkur sem féll í dag. Dómurinn ómerkti úrskurð umhverfisráðherra frá árinu 2003 sem staðfesti ákvörðun Skipulagsstofnunar um að 322 þúsund tonna álver þyrfti ekki að sæta umhverfismati.

Mugison Vestfirðingur ársins 2004

Tónlistarmaðurinn Örn Elías Guðmundsson, Mugison, er Vestfirðingur ársins 2004 samkvæmt vali lesenda bb.is. Örn Elías hefur staðið sig frábærlega á tónlistarsviðinu á undanförnum árum og sérstaklega á því síðasta, en þá gaf hann m.a. út plötuna Mugimama, Is This Monkeymusic? sem fjölmargir gagnrýnendur hafa valið bestu plötu ársins.

Viðvörunarbúnaður til í júní 2006

Sameinuðu þjóðirnar áætla að viðvörunarbúnaður vegna flóðbylgna verði kominn í gagnið fyrir júní 2006 í löndunum við Indlandshaf. Talið er að ef slíkur búnaður hefði verið í löndunum, þar sem flóðbylgjan á annan dag jóla reið yfir, hefði mátt bjarga mörgum þúsundum manna, en um 156 þúsund létust í hamförunum.

Loðnukvótinn verði stóraukinn

Hafrannsóknarstofnunin hefur lagt til við sjávarútvegsráðherra að loðnukvótinn verði aukinn um 556 þúsund tonn. Þetta er niðurstaðan eftir rannsóknarleiðangur Árna Friðrikssonar þar sem loðnuganga var mæld norður og austur af landinu. Stofnunin kynnti ráðherra tillögu sína í dag, en þar er lagt til að loðnukvótinn verði alls 985 þúsund tonn á vertíðinni.

Geir á tvo fundi

Geir H. Harde, fjármálaráðherra hleypur í skarðið fyrir Davíð Oddsson á tveimur fundum erlendis í forföllum utanríkisráðherra.

Marktækt að spyrja um stuðning

Ríkisstjórnin segir út í hött hjá Gallup að spyrja um lista staðfastra þjóða. Björn Bjarnason segir að marktækt hefði verið að spyrja um hernað Bandaríkjamanna í Írak.</font /></b />

Staðföst en tækifærissinnuð

Leiðtogar staðfastra ríkja fá ekki háa einkunn í nýlegum greinaflokki Nicholas D. Kristof sem skrifar pistla tvisvar í viku á leiðaraopnu The New York Times.

Flugleiðir kaupa vélar og leigja

Flugleiðir hafa haslað sér völl á nýju sviði flugvélaleigu með stofnun fyrirtækis í samvinnu við Gunnar Björgvinsson og fleiri í Lichtenstein. Fyrirtækið hefur keypt þrjár notaðar Boeing 737-500 flugvélar af írska flugfélaginu Aer Lingus og leigir þær til litháiska flugfélagsins Air Baltic Latwia til fimm ára.

Fundað um Kárahnjúkamál

Boðað hefur verið til fundar í félagsmálanefnd Alþingis á föstudaginn kemur að ósk fulltrúa Samfylkingarinnar í nefndinni þar sem ræða á starfsmannamál á Kárahnjúkasvæðinu og framkvæmd á samningum við Impregilo.

Mótmælir ásökunum um skattsvik

Impregilo hefur sent frá sér tilkynningu vegna ásakana um að fyrirtækið hafi ekki greitt skatta hér á landi. Þar segir að fullyrðingar um skattsvik séu ósannar, ómaklegar og ósmekklegar og að fyrirtækið hafi greitt rúmlega 855 milljónir í skatta frá júlíbyrjun 2003 fram í nóvember 2004.

Tvísköttunarsamningurinn í gildi

Garðar Valdimarsson, lögmaður Impregilo og fyrrverandi ríkisskattstjóri, segir að tvísköttunarsamningur við Portúgali hafi tekið gildi þann 11. apríl 2002 og komið til framkvæmda 1. janúar 2003.

Umhverfisráðuneytið hyggst áfrýja

Umhverfisráðuneytið mun áfrýja dómi Héraðsdóms Reykjavíkur frá í dag um að álver Alcoa í Reyðarfirði þurfi að fara í gegnum nýtt, sjálfstætt umhverfismat. Héraðsdómur ómerkti þar með úrskurð umhverfisráðherra frá árinu 2003 um að álverið þyrfti ekki að sæta nýju umhverfismati.

Sömu réttindi til allra

Ögmundur Jónasson, formaður BSRB, styður það að allir fái sambærileg lífeyrisréttindi, hvort sem þeir starfa á almennum markaði eða hjá hinu opinbera.

Búist við að kosningum verði flýtt

Búist er við því að Anders Fogh Rasmussen boði til þingkosninga fljótlega þó að níu mánuðir séu enn eftir af kjörtímabili þingmanna.

Milljónir í brotajárn

Litlu munaði að norskur banki yrði nokkrum milljónum króna fátækari þegar verið var að taka gamla hraðbanka úr umferð og senda þá í brotajárn og bræðslu.

Aldrei minni stuðningur við innrás

Innrásin í Írak hefur aldrei notið minni stuðnings meðal Breta en nú um stundir samkvæmt nýrri skoðanakönnun Populus. Einungis 29 prósent aðspurðra sögðu það hafa verið rétta ákvörðun að steypa Saddam Hussein af stóli. Í apríl 2003, skömmu eftir fall einræðisherrans, voru 64 prósent Breta þessarar skoðunar.

Ekki hægt að kjósa alls staðar

Iyad Allawi, forsætisráðherra bráðabirgðastjórnar Íraks, hefur í fyrsta sinn viðurkennt opinberlega að ekki verði hægt að kjósa á nokkrum stöðum í Írak vegna óaldarinnar sem ríkir þar.

Best að treysta á heimamenn

Ríki og samtök sem leggja fram fé til neyðarhjálpar í Asíu í kjölfar náttúruhamfaranna þar ættu frekar að verja því í vel þjálfaðar sveitir heimamanna en að senda erlendar hjálparsveitir á vettvang. Þetta sögðu talsmenn Rauða krossins í gær og sögðu að vel þjálfaðir heimamenn væru betur til þess fallnir að bjarga lífum en aðkomumenn.