Skattrannsókn á fjármálum Baugs

Skattayfirvöld þurfa að taka ákvörðun um endurálagningu skatta á Baug í síðasta lagi á morgun annars fyrnist hluti af málinu sem snýr að ríkisskattstjóra.

Sjö Íslendingar á hættusvæðum

Utanríkisráðuneytið hefur ekki upplýsingar um 26 Íslendinga stadda í Asíu. Aðeins sjö þeirra eru taldir hafa verið á hættusvæði vegna jarðskjálftans við Súmötru. Fólk af taílenskum ættum hefur óskað aðstoðar Rauða krossins við að hafa uppi á ættingjum. </font /></b />

Landnemar láta undan

Tuttugu fjölskyldur í ísraelskri landnemabyggð hafa lýst sig viljugar til að flytjast frá hinu umdeilda Gasa-svæði. Þetta er fyrsta fólkið til að fallast á fyrirætlanir Ariels Sharons, forsætisráðherra Ísraels, um brottflutning Ísraela frá Gasa svæðinu og hluta Vesturbakkans.

Inflúensan færist í aukana

Þrjú inflúensutilfellið af A stofni höfðu greinst með vissu á landinu í gær, samkvæmt upplýsingum frá landlæknisembættinu. Því má búast við að inflúensan færist í aukana á næstu vikum.

Umfangsmesta hjálparstarf sögunnar

Umfangsmesta hjálparstarf í sögu Sameinuðu þjóðanna er hafið á hamfarasvæðunum í Suðaustur-Asíu þar sem talið er að allt að sextíu þúsund manns hafi farist. Hundruð flugvéla frá löndum í öllum heimshornum eru væntanleg til svæðanna í dag með hjálpargögn en nú er talið hvað brýnast að koma í veg fyrir útbreiðslu drepsótta og hungursneyð.

13 írakskir lögreglumenn drepnir

Skæruliðar felldu þrettán írakska lögreglumenn og særðu tvo í geysiharðri árás sem þeir gerðu á lögreglustöð í borginni Tíkrit í Írak í morgun. Margskonar vopnum var beitt og reyndu lögreglumennirnir að verjast en ekki fer sögum af mannfalli í röðum skæruliða.

20 Íslendinga enn saknað

Ekki er enn vitað um afdrif 20 Íslendinga, sem að líkindum eru á hamfarasvæðunum, en í fyrstu var ekki vitað um afdrif 55 Íslendinga. Að mati utanríkisráðuneytisins, sem grafist hefur fyrir um afdrif Íslendinga á svæðinu, eru flestir þeirra sem ekki hefur náðst til á tiltölulega hættulitlum svæðum.

Bensínverðið lækkað um tvær krónur

Stóru olíufélögin þrjú lækkuðu lítrann á bensíni um tvær krónur í gær og verð lækkaði einnig á sjálfsafgreiðslustöðvum dótturfélaga þeirra. Lítrinn kostar nú 105,60 krónur á stöðvum með fullri þjónustu og allt niður í 97,40 krónur hjá Orkunni.

Þjófurinn skilaði veskinu

Veski sem stolið var af konu í Bónusversluninni í Hafnarfirði fyrir jól og innihélt meðal annars mikilvæg læknisgögn um ungan son hennar er komið í leitirnar. 35 ára kona sem stal því kom á lögreglustöðina í Hafnarfirði í gærkvöldi og skilaði því ásamt kortum, skilríkjum, síma og öðrum verðmætum sem voru í veskinu.

Janúkovítsj leitar til Hæstaréttar

Úkraínski forsætisráðherrann Viktor Janúkovítsj neitar að játa sigur Viktors Júsjenkos í forsetakosningunum sem fram fóru í landinu í fyrradag. Hann hefur lýst því yfir að hann muni leita til Hæstaréttar Úkraínu til þess að fá úrslitunum hnekkt. Janúkovítsj hefur lagt inn í kringum fimm þúsund kvartanir yfir því hvernig staðið var að talningu atkvæða.

Vesturlandsvegi lokað vegna slyss

Vesturlandsvegi ofan við Borgarnes var um tíma lokað í gærkvöldi vegna þess að þrír bílar lentu þar í árekstri í afleitu veðri og grafa fór út af veginum þar skammt frá. Engan sakaði alvarlega í árekstrinum sem varð með þeim hætti að ökumaður bíls nam staðar þegar hann sá ekki lengur neitt út.

Jólatré Eyjamanna hent út í sjó

Óprúttnir náungar hafa tekið sig til og rifið upp jólatréð sem Vestmannaeyjabær setti upp við Stafkirkjuna á Skansinum og hent því með ljósaseríunni á í sjóinn. Lögregla kannar nú málið en hefur ekki fundið spellvirkjana.

Rólegt hjá lögreglu

Mjög rólegt var yfir öllu skemmtanahaldi í gærkvöldi eftir óvenju mikinn eril hjá lögreglu víða um land í fyrrinótt vegna drykkjuláta fram eftir allri nóttu. Það virðist því vera að vinnuvikan hafi hjá mörgum hafist degi seinna en almanakið gerir ráð fyrir því ástandið í gærkvöldi og í nótt var líkara því sem gerist aðfararnætur mánudaga.

Samgönguráðherra Úkraínu drepinn?

Samgönguráðherra Úkraínu, Heorhiy Kirpa, fannst látinn af skotsári á heimili sínu rétt utan við Kænugarð í gær. Ekki er vitað hvort hann var myrtur eða hvort hann framdi sjálfsmorð. Kirpa var einn áhrifamesti meðlimur ríkisstjórnarinnar.

Fólk sniðgangi kosningarnar

Osama bin Laden virðist hafa hvatt til þess að Írakar sniðgangi kosningarnar sem eiga að fara fram í næsta mánuði. Hljóðupptaka sem sögð er frá bin Laden er komin fram þar sem hann ber meðal annars lof á Abu Musab al-Zarqawi, leiðtoga al-Kaída í Írak, og styður uppreisn súnníta í Írak.

Flugskeyti grandaði bíl á Gasa

Flugskeyti Ísraelshers grandaði bíl í borginni Kan Younis á Gasa-ströndinni fyrir stundu. Palestínskir skæruliðar voru á ferð í bílnum og sluppu þeir nánast ómeiddir að sögn sjónarvotta. Vegfarendur í grennd slösuðust lítillega.

Dæmdir fyrir njósnir í Kína

Fjórir Taívanbúar hafa verið handteknir í Kína og dæmdir í allt að tíu ára fangelsi fyrir njósnir. Fólkið er á aldrinum 26-63 ára. Að auki var einn Kínverji dæmdur fyrir að aðstoða við njósnirnar.

Guðlaugur Bergmann látinn

Guðlaugur Bergmann framkvæmdastjóri lést á heimili sínu aðfararnótt 27. desember, sextíu og sex ára að aldri. Guðlaugur stundaði verslunarstörf um áratugaskeið og var gjarnan kenndur við verslun sína Karnabæ. Undanfarin ár hefur hann rekið ferðaþjónustu að Hellnum á Snæfellsnesi og bókaútgáfu.

Ráðherra athugar beiðni Fishers

Chieko Nohno, dómsmálaráðherra Japans, hefur fallist á að taka til greina beiðni Bobbys Fischers um að verða vísað úr landi og sendur hingað til lands. Að öðrum kosti verður Fischer vísað til Bandaríkjanna þar sem hans bíður fangelsisvist.

Óljóst um ferðir sextán Íslendinga

Tveir Íslendingar höfðu samband við neyðarvakt utanríkisráðuneytisins í nótt og létu vita af ferðum sínum í Taílandi. Nú er aðeins óljóst um ferðir sextán Íslendinga sem að líkindum eru á hamfarasvæðunum.

Óttast að 55.000 hafi látist

Staðfest hefur verið að 36.900 fórust í hamförunum í Suðaustur-Asíu á sunnudag. Tuga þúsunda er saknað og óttast er að ekki færri en 55.000 hafi farist.

200 Svíar taldir af

Allt að 200 Svíar eru taldir vera meðal þeirra sem fórust á Taílandi. Fjöldi Norðurlandabúa var á ferðamannasvæðum þar sem nánast enginn hefur fundist á lífi. Sjónarvottar segja þúsundir ferðamanna hafa farist. 

Lyfjaframleiðsla á Grenivík

Lyfjaframleiðsla er að hefjast á Grenivík við Eyjafjörð og verða lyfin framleidd eftir uppskriftum íslenskra apóteka. Fimm eða sex störf skapast við framleiðsluna.

Spáð vonskuveðri á gamlárskvöld

Horfur eru á vonskuveðri víða um land á gamlárskvöld og jafnvel útlit fyrir að fresta verði áramótabrennum á höfuðborgarsvæðinu. Þar sem nokkrir dagar eru enn til áramóta geta spár breyst en spárnar á þessari stundu eru sammála um það hvernig veðrið verður á Íslandi um áramótin.

Ráðuneytið fór ekki að lögum

Dómsmálaráðuneytið fór ekki að lögum þegar það synjaði fanga á Litla-Hrauni um dagsleyfi. Fanginn óskaði í júní síðstliðnum eftir dagsleyfi síðar í mánuðinum. Fangelsisyfirvöld synjuðu beiðni hans, meðal annars af þeirri ástæðu að fanginn ætti óafgreitt mál í kerfinu.

Óttast leka úr kjarnorkuveri

Ótti við leka úr kjarnorkuveri í nágrenni Kelambakkam á Suður-Indlandi hamlar þar hjálparstarfi. Þetta kemur fram í fréttatilkynningu frá Hjálparstarfi kirkjunnar og segir þar að systurfélag þess, Social Action Movement, séu einu hjálparsamtökin sem hafi komið fórnarlömbum flóðbylgnanna þar til aðstoðar.

Óvissa um 15 Íslendinga

Einn Íslendingur til viðbótar sem var á hamfarasvæðunum í Suðaustur-Asíu hefur látið vita af sér frá því um hádegisbil. Nú er því aðeins óljóst um ferðir fimmtán Íslendinga sem að líkindum eru á svæðunum þar sem flóðbylgjurnar gengu á land á sunnudag. Þeim hefur því fækkað verulega frá þeim 55 sem ekki var vitað af fyrst eftir hamfarirnar.

Varað við ferðalögum til svæðanna

Utanríkisráðuneytið varar við ferðalögum til hamfarasvæðanna í Suðaustur-Asíu og sérstaklega ákveðinna svæða á Taílandi, Indlandi, Srí Lanka, Maldíveyjum og í Indónesíu.

Impregilo að lenda í tímaþröng

Ítalska verktakafyrirtækið Impregilo, sem er að reisa Kárahnjúkavirkjun, er að lenda í alvarlegri tímaþröng en ASÍ leggst gegn því að það flytji inn 150 Kínverja til að reyna að vinna upp seinkanir. 

Flugeldasýning við Perluna í kvöld

Hin árlega flugeldasýning flugeldamarkaða björgunarsveitanna í Reykjavík og Bylgjunnar fer fram við Perluna í kvöld. Flugeldunum verður skotið upp við tónverk Todmobile og Sinfóníuhljómsveitar Íslands sem jafnframt verða flutt á Bylgjunni.

Hátt í 50 þúsund hafa látist

Hátt í fimmtíu þúsund manns hafa farist í náttúruhamförunum í Asíu og er óttast við að sú tala eigi enn eftir að hækka. Allar tölur eru enn á reiki en stjórnvöld á hamfararsvæðunum telja að allt að 57 þúsund gætu hafa týnt lífi. Enn er ekki vitað um afdrif 15 Íslendinga sem vitað er að voru á þessum slóðum.

Vistmenn greiða fyrir fataþvott

Formaður Félags eldri borgara á Ísafirði segir það skelfilega ákvörðun hjá stjórnendum Heilbrigðisstofnunar Ísafjarðarbæjar að láta vistmenn á öldrunardeild greiða fyrir fataþvott. Frá og með áramótum þurfa vistmenn að greiða 5.500 á mánuði fyrir þvottinn en framkvæmdastjóri stofnunarinnar segir margt framar í forgangsröðinni hjá stofnuninni en að standa straum af þessu.

370 milljónir frá páfagarði

Páfagarður hefur safnað sex milljónum dollara, um 370 milljónum íslenskra króna, sem ætlað er að veita í neyðaraðstoð fyrir fórnarlömb flóðanna í Suðaustur-Asíu. Jóhannes Páll páfi kallaði á aðstoð alþjóðasamfélagsins strax á sunnudag þegar tala látinna var aðeins um 3000 en hún er nú komin yfir 50 þúsund og fer hækkandi.

Flugleiðir senda vél til Taílands

Tala látinna vegna hamfaranna í Asíu er komin upp í 55 þúsund og er enn óttast að hún kunni að hækka. Ekkert hefur enn heyrst af þrettán Íslendingum sem vitað er að voru á þessum slóðum. Klukkan 18 í kvöld fer flugvél frá Flugleiðum fyrir sænsk stjórnvöld til Taílands að sækja sænska ferðamenn þar.

Sniglarnir styrkja veikan dreng

Sniglarnir, Bifhjólasamtök lýðveldisins, ætla að afhenda Torfa Lárusi Karlssyni, sjö ára dreng sem liggur á Barnaspítala Hringsins, peningagjöf nú klukkan fimm. Torfi Lárus er með sogæða- og bláæðasjúkdóm og er á leið til Bandaríkjanna til læknismeðferðar.

Fundað um Kínverjana

Samstarfsnefnd um atvinnuréttindi útlendinga fundar í næstu viku um þá ósk Impregilo að ráða 150 Kínverja til starfa.

Sjúkdómar geta lagt eins marga

Alþjóðaheilbrigðisstofnunin óttast að sjúkdómar í kjölfar hamfaranna í Asíu geti lagt eins marga að velli og hamfarirnar sjálfar. David Nabarro, sem er háttsettur innan stofnunarinnar, segir það skipta gríðarmiklu máli að koma lyfjum, læknishjálp og vatni til hamfarasvæðanna sem fyrst, áður en sjúkdómar ná að gjósa upp.

Hækkanir að þremur prósentum

Launamenn fá eins og hálfs til þriggja prósenta launahækkun um næstu áramót eftir því hvað kjarasamningarnir ná langt inn á næsta ár.

Fjögurra mánaða töf hjá Impregilo

Fjögurra mánaða töf hefur orðið á vinnu Impregilo við að steypa távegg undir aðalstífluna á Kárahnjúkum. Sigurður Arnalds upplýsingafulltrúi segir að fyrirtækið eigi aftur að vera komið á rétt ról í júní. </font /></b />

Flugeldasalan hafin

Flugeldasalan hófst á þriðjudaginn og eru sölustaðir flugelda tæplega fimmtíu talsins í ár. Sölustöðum hefur fjölgað lítillega síðan í fyrra þegar þeir voru rúmlega fjörutíu talsins. Flestir sölustaðanna eru á vegum björgunarsveita og íþróttafélaga þrátt fyrir að nokkur einkafyrirtæki blandi sér í samkeppnina.

Töskunni skilað

Tösku sem stolið var í verslun Bónuss við Helluhraun skömmu fyrir jól og innihélt ómetanleg læknisgögn vegna langveiks barns var skilað til lögreglu í fyrrakvöld.

Mikið af falsaðri merkjavöru

Aukið eftirlit hefur skilað sér í því að hundruð kílóa af falsaðri merkjavöru voru haldlögð á Keflavíkurflugvelli á þessu ári. Brot á lögum um vörumerki geta varðað fangelsi allt að þrjá mánuði. Fölsun merkjavarnings er mjög víðtækur og skipulagður iðnaður í heiminum.

Best að útiloka dýrin frá hávaða

"Besta leiðin til þess að koma í veg fyrir ofsahræðslu gæludýra á áramótunum er að útiloka þau frá áreiti af völdum flugelda," segir Helga Finnsdóttir dýralæknir.

Langflestir frá Norðurlöndum

Langflestir þeirra ferðamanna sem saknað er af hamfarasvæðunum í Asíu komu frá Norðurlöndum. Um fimmtán hundruð Svía er saknað og ekki er vitað <font size="2"></font>um afdrif sex hundruð Norðmanna.

Tala látinna komin í 60 þúsund

Sextíu þúsund manns hafa fundist látnir eftir flóðbylgjuna í Suðaustur-Asíu. Óttast er að jafnmargir eða fleiri kunni að látast af völdum smitsjúkdóma vegna hörmunganna.