Fjögurra mánaða töf hjá Impregilo

Fjögurra mánaða töf hefur orðið á vinnu Impregilo við steyptan sökkul við aðalstífluna á Kárahnjúkum. Sigurður Arnalds, upplýsingafulltrúi Landsvirkjunar, segir að meiningin hafi verið að klára að steypa távegg sem fyllir í gilið fyrir áramót og hafa svo hægt um sig í steypuvinnu þangað til í vor en það hafi ekki tekist. "Þessari steypuvinnu mun ekki ljúka fyrr en í apríl. Í haust var þetta tveimur mánuðum á eftir áætlun en núna má segja að þetta taki fjóra mánuði að klára. Þessar framkvæmdir ganga hægar í vetur og því verður þeim lokið fjórum mánuðum síðar en áætlað var," segir Sigurður. Ofan á steypta sökkulinn kemur steypt kápa utan á grjótfyllingu. "Kápan er tugir sentimetra á þykkt og hún er dregin utan á grjótfyllinguna. Þessi vinna á að fara fram sumarið 2005 og 2006. Hana er ekki hægt að gera að vetrarlagi vegna þess að hún þolir ekki frost," segir hann. Steypuvinnan við távegginn ofan í gilinu er unnin undir þaki. "Við erum með seglhús sem er híft upp jafnóðum. Það er meira fyrir því haft en gerist og gengur en þetta er vel framkvæmanlegt. Með því að klára vegginn í apríl og halda áfram að fylla tel ég að Impregilo verði komið aftur á rétt ról í júní. Þá verði hægt að steypa klæðninguna á réttum tíma," segir hann. Ekki reynir á dagsektir og segir Sigurður að ekki reyni á þær fyrr en í lok verksins. Fyrsta dagsetning sem hafi skipt máli hafi verið að veita ánni í hjáveitugöngin og það hafi tekist. Næsta stóra dagsetning sé að byrja að fylla í lónið. Það sé áætlað 1. september 2006. Allar áætlanir ganga út á að það verði hægt. "Þessar seinkanir eru að mestum hluta ekki verktakanum að kenna heldur jarðfræðinni. Í gljúfrinu var t.d. misgengi sem þurfti að föndra við og steypa yfir. Táveggurinn breyttist og varð stærri. Fastur botn á gilinu var sjö til tólf metrum lægri en áætlað. Þar við bættist að steypuvinnan var á eftir áætlun því að Impregilo var í vandræðum með að fá nóg af hæfu fólki," segir Sigurður.