Upp­gjörið: Víkingur - Grindavík/Njarðvík 3-0 | Annar sigur Víkings spyrnti liðinu frá botninum

Bergdís Sveinsdóttir skoraði tvö mörk og lagði upp eitt þegar Víkingur lagði Grindavík/Njarðvík að velli, 3-0, í 17. umferð Bestu-deildar kvenna í fótbolta á Heimavelli hamingjunnar í Fossvoginum í dag. Þetta var annar sigur Víkings í röð í deildinni sem kemur liðinu upp úr botnsæti.

Bæði lið höfðu betur í síðustu umferð deildarinnar en Víkingur vann lífsnauðsynlegan sigur á móti FH á meðan Fram vann sannfærandi sigur gegn Fram.

Einar Guðnason, þjálfari Víkings, stillti upp sama byrjunarliði og í sigrinum í Kaplakrika á meðan Gylfi Tryggvason, kollegi hans hjá Grindavík/Njarðvík, gerði þrjár breytinga á liði sínu. Katrín Lilja Ármannsdóttir, Emersen Jennings og Sigríður Emma F. Jónsdóttir komu inn í liðið í stað Birtu Birgisdóttur, Elísu Birtu Káradóttur og Júlíu Ruth Thasaphong.

Grindavík/Njarðvík byrjaði leikinn betur og var meira með boltann. Varnarleikur Víkings var hins vegar vel skipulagður og heimakonur gáfu fá sem engin færi á sér. Víkingur vann sig svo hægt og bítandi betur og betur inn í leikinn.

Bergdís Sveinsdóttir kom Víkingi yfir þegar rúmur stundarfjórðungur var liðinn af leiknum. Þórdís Hrönn Sigfúsdóttir gaf þá góða fyrirgjöf á Bergdísi Sveinsdóttur sem skoraði með góðu skoti á fjærstönginni.

Bergdís skoraði sigurmark Víkings í sigrinum gegn FH í siðustu umferð deildarinnar og tók skotskóna aftur með sér í þennan leik.

Bergdís átti svo hornspyrnuna sem leiddi að því að Víkingur tvöfaldaði forystu sína um miðbik fyrri hálfleiks. Eftir darraðardans inn í markteig Grindavíks/Njarðvíkur setti Áslaug Dóra Sigurbjörnsdóttir boltann í netið af stuttu færi.

Bergdís kóróanaði flotta frammistöðu sína í leiknum með því að geirnegla sigur Víkings með öðru marki sínu í leiknum um miðjan seinni hálfleik.

Víkingur vann þá boltann á hættulegum stað eins og þeir gerðu trekk í trekk í leiknum. Jasmín Erla Ingadóttir lagði boltann í hlaupaleiðina fyrir Bergdísi sem kláraði færið af stakri prýði.

Atvik leiksins

Allan leikinn var unun að fylgjast með vinnframlaginu hjá Víkingi, vel skipulögðum varnarleik liðsins og sniðuglega útfærðum sóknarleik. Víkingsliðið uppskar eins og það sáði.

Stjörnur og skúrkar

Áslaug Dóra var eins og klettur í hjarta varnarinnar hjá Víkingi og lagði síðan lóð og vogarskálina með því að skora. Telma Ívarsdóttir greip vel inn í þegar þess þurfti og varði nokkrum sinnum vel.

Bergdís spilaði vel inni á miðjunni, bæði í vörn og sókn. Skoraði svo tvö mörk og lagði upp eitt. Bergþóra Sól var sömuleiðis öflug inni á miðsvæðinu.

Arna Ísold Stefánsdóttir var svo mikilvæg bæði í pressu Víkingsliðsins sem og uppspili liðsins. Vann marga bolta og skapaði góðar stöður fyrir samherja sína.

Emerson Jennings var hættulegust í sóknarleik Grindavíks/Njarðvíkur og gestirnir leituðu mikið til hennar í sem lokahnykks í sóknaruppbyggingu sinni.

Dómarar leiksins

Dómarar leiksins, þeir Hreinn Magnússon, Jovan Subic, Rögnvaldur Þ. Höskuldsson og Gylfi Már Sigurðsson, létu leikinn flæða vel og voru lítt áberandi. Það er dómgæsla að mínu skapi og þar af leiðandi fá þeir átta í einkunn fyrir vel unninn störf.

Stemming og umgjörð

Léttur andi í blíðskaparveðri á Heimavelli hamingjunnar í dag. Girnilegar samlokur í boði í blaðamannaaðstöðunni, kaldir gosdrykkir og rjúkandi heitt og gott kaffi.