Leik lokið: Þór/KA-Fram 2-0 | Ungi mið­vörðurinn hetja norðankvenna

Hin unga Karen Hulda Hrafnsdóttir skoraði gríðarlega mikilvægt mark fyrir Þór/KA í 2-0 sigri á Fram í fjórtándu umferð Bestu deildar kvenna í kvöld. Norðankonur stöðvuðu þar með fjögurra leikja sigurgöngu Framkvenna.

Þór/KA er að komast í gang og fjær botninum þar sem þær dúsuðu stóran hluta sumars en þetta var fjórði sigur liðsins í síðustu sex leikjum.

Karen Hulda, sem er aðeins sautján ára gömul, hefur komið sterk inn í miðvörðinn og er nú farin að skora mörk eins og lærimóðirin við hlið hennar, Arna Sif Ásgrímsdóttir, var líka þekkt fyrir. Arna Sif átti þátt í markinu sem kom eftir aukaspyrnu og í upphafi seinni hálfleiks.

Erin Flurey innsiglaði síðan sigurinn eftir einstaklingsframtak undir lok leiksins.

Frekari umfjöllun og viðtöl koma inn á Vísi seinna í kvöld.