Norð­maður tryggði Írak inn á HM og mætir Noregi í fyrsta leik

Staðan var 1-1 í úrslitaleik Íraks og Bólivíu þegar Marko Farji var skipt inn af varamannabekknum. Aðeins tveimur mínútum síðar átti hann svo glæsilegan sprett upp kantinn og gaf boltann fyrir á fyrirliðann Aymen Hussein sem skoraði sigurmarkið.

Írak tryggði sig þar með inn á HM í sumar og verður með Noregi, Frakklandi og Senegal í riðli.

„Þetta er algjör draumur. Þetta er alveg sturlað, en það verður skrítið að mæta Noregi, ég ólst þar upp,“ sagði Farji við TV2.

Farji var áður á mála hjá Stromsgodset í Noregi en er nú leikmaður Venezia á Ítalíu. Hann er fæddur í Grimstad í Noregi en á foreldra frá Írak og spilar fyrir írakska landsliðið.

Írak, sem þjálfað er af Ástralanum Graham Arnold, mun snúa aftur á heimsmeistaramótið í fyrsta sinn síðan í Mexíkó 1986.

„Ég er svo glaður að við höfum glatt 46 milljónir manna, sérstaklega með það sem er að gerast í Miðausturlöndum um þessar mundir. Ég verð að þakka leikmönnunum. Vinnusiðferðið og írakski baráttuandinn gerðu það að verkum að við unnum þennan leik,“ sagði Graham Arnold eftir leikinn.