Gabriel Jesus stjarna Arsenal í enn einum Meistara­deildar­sigrinum

Arsenal hélt sigurgöngu sinni áfram í Meistaradeildinni í fótbolta í kvöld og hefur unnið sjö fyrstu leiki sína í keppninni.

Arsenal vann 3-1 útisigur á Internazionale á San Siro og er nánast búið að tryggja sér efsta sætið með 21 stig og plús átján í markatölu (20-2) í fyrstu sjö leikjunum.

Brasilíumaðurinn Gabriel Jesus minnti á sig í kvöld með tveimur mörkum en hann er kominn sterkur inn í liðið eftir meiðsli.

Brasilíumaðurinn fékk tækifærið og greip það með báðum höndum.

Gabriel Jesus kom Arsenal í 1-0 á 10. mínútu eftir fyrirgjöf frá Jurrien Timber og kom enska liðinu síðan aftur yfir á 31. mínútu með skalla eftir fyrirgjöf frá Leandro Trossard.

Petar Sucic jafnaði metin á 18. mínútu en Arsenal var 2-1 yfir í hálfleik.

Viktor Gyökeres kom inn á völlinn sem varamaður fyrir Gabriel Jesus og innisiglaði sigurinn með þriðja markinu sex mínútum fyrir leikslok eftir sendingu frá Bukayo Saka.

Arsenal er langbesta liðið í Meistaradeildinni það sem af er en Inter á á hættu að falla úr efstu átta sætunum á miðvikudag.