Meistararnir stimpluðu sig út með öruggum sigri

Nýkrýndir Spánarmeistarar Barcelona sóttu Athletic Bilbao heim í lokaumferð spænsku úrvalsdeildarinnar fótbolta og sóttu að lokum öruggan 0-3 sigur.

Barcelona réð lögum og lofum í leiknum í kvöld og var miklu meira með boltann en heimamenn. Færin komu á færibandi en markahrókurinn Robert Lewandowski nýtti tvö þeirra í fyrri hálfleik, staðan 0-2 í hálfleik. Lewandowski endaði næst markahæstur í deildinni með 27 mörk, fjórum mörkum færri en Mbappé.

Gestunum gekk þó lítið að skora í seinni hálfleik þrátt fyrir að vera með boltann mikið í fótunum en það var ekki fyrr en undir lok uppbótartíma sem Dani Olmo skoraði mark úr víti og innsiglaði öruggan sigur Barcelona.