„Ég er búin að fæða þrjú börn en þetta er versta sem ég hef upp­lifað“

Slysið átti sér stað á föstudaginn langa þegar María Sigrún Hilmarsdóttir, fréttakona RÚV, var á fjallaskíðum á Snæfellsjökli ásamt fjölskyldu sinni. Hún segir það sérkennilegt að vera sjálf orðin umfjöllunarefni fjölmiðla. 

„Ég náttúrlega vinn við að fá fólk til að koma í viðtal. Hvað get ég svo sagt þegar einhver biður mig um að koma í viðtal? Að segja nei við því, það myndu nú einhverjir segja að það væri bara hræsni,“ segir María. 

Eins og gjarnan gerði slysið ekki boð á undan sér og voru aðstæður með besta móti.

„Það var ótrúlega gott veður, frábært útsýni og eiginlega logn.“

Beið í rólegheitum meðan fjölskyldan renndi sér áfram

María rak lestina fyrstu ferðina niður ef einhver skyldi detta.

„Það fór ekki betur en svo að ég datt og það snerist svona svakalega upp á vinstri fótinn. Þetta var hrikalega vont og ég er búin að fæða þrjú börn en þetta er versta sem ég hef upplifað af sársauka.“

María margbrotnaði og sleit liðband og krossband í hné við fallið.

„Það er svo merkilegt með líkamann að ég dofna mjög fljótt þarna upp, og er ein þarna.“

Hún segist einkar þakklát skjótum viðbrögðum ókunnugra sem gerðu kærasta hennar og börnum viðvart.

„Hann skíðar á mikilli ferð neðar og þar voru tveir menn á snjósleða og þeir koma þarna upp. Þeir birtast þarna eins og englar og ferja mig niður á sleðunum.“

María segist ekki hafa áttað sig strax á hvað hve illa væri fyrir henni komið. Hún hafi þó vitað að eitthvað hafi gefið sig. Henni lá ekki mikið á að komast upp á spítala, þegar niður úr brekkunni var komið.

„Meira að segja fyrst þegar ég stóð þarna upp þá hélt ég nú að ég gæti skíðað niður, jafnvel á einum fæti. Ég hvatti þau sem voru með mér að fara fleiri ferðir. Ég kom mér fyrir í skottinu í bílnum og var bara í sólbaði og tala við fólk og tala í símann. Þau fóru sem sagt aðrar ferðir.“

Og þú varst ekkert að drífa þig?

„Nei, ég hugsaði: Æ, ætli það þurfi ekki að mynda þetta, það eru að koma páskar og ég þarf að láta taka mynd. Það var enginn asi þarna. Ég hélt ég hefði kannski tognað og slitið eitthvað smávegis en mig óraði ekki fyrir þessu. Svo bara keyrðum við í rólegheitum í bæinn. Svo vorum við öll orðin svöng og fengum okkur Subway áður en mér var skutlað á slysadeildina.“

Verst að geta ekki sinnt börnunum

Maríu segist hafa brugðið við þegar á slysadeildina var komið og hún tekin úr skíðabuxunum. 

„Þá sé ég á mér vinstri fótinn og þetta er eins og fílsfótur. Þá var mér rúllað beint í myndatöku og það varð ljóst að það þyrfti að gera aðgerð. Það var gert síðan á páskadag.“

Nú sé búið að gera við ökklann en eftir sé hnéaðgerð. 

Þrátt fyrir allt segir María ekki skilið við skíðin og segir enga ástæðu til að vorkenna sér. 

„Þó ég sé hérna farlama í einhverjar vikur þá er það ekkert alvarlegt í stóra samhenginu. Og að kynnast því að vera í hjólastól, ég er bara tímabundið í hjólastól.“

Hún segir allar líkur á að hún nái sé að fullu. Hún sé hraust fyrir og með höfuðið á réttum stað. Verst sé þó að geta ekki sinnt börnunum.

„Þau eru náttúrulega háð mér og ég þeim. Það er erfiðast að geta ekki sinnt þeim alveg. Yngsta dóttir mín er fötluð og þarf mikla hjálp svo þetta er sérstaklega erfitt fyrir hana.“