Tóti fékk bílinn lánaðan frá Líf Magneudóttur

Íslenski draumurinn fagnaði 25 ára afmæli sínu í fyrra. Í þáttunum Stjörnubíó á RÚV kom fram að Líf hefði lánað Tóta bílinn. Hún gengst við þessu í samtali við Stefán Pálsson flokksbróður sinn á Facebook.

Blái bíllinn er í lykilhlutverki í myndinni þar sem aðalsöguhetjan Tóti flakkar á milli söluturna í Reykjavík til að reyna að koma búlgörskum sígarettum á íslenskan markað. Hann verður bensínlaus, er asnalega stór fyrir litla bílinn og bíllinn er eins konar táknmynd fyrir hvernig Tóti er með allt niður um sig. 

Þegar Opal-sígaretturnar fara óvænt að rjúka út er Tóti ekki lengi að kveðja bláu drusluna og kaupa sér spánýjan Range Rover með einkanúmerinu Total, því Opal og Tóti eru frátekin.

Utangarðsmenn sömdu lagið Íslenski draumurinn fyrir myndina en myndband við lagið má sjá að neðan.

„Þetta var fyrsti bíllinn minn, sjálfskiptur Suzuki Alto '86 módel. Vinkonur mínar gerðu grín að honum og kölluðu hann saumavélina og upp úr því gaf ég honum nafnið Nálin. Líf á Nálinni,“ segir Líf.

„Ég lánaði bílinn í einhverja mánuði gegn því að teymið tæki að sér að greiða stöðumælasektirnar sem ég hafði safnað enda bjó ég í miðbænum á þessum tíma. Mig minnir reyndar að ég hafi síðan gert það sjálf að lokum.“

Hún bætir því við að hafa ekki fengið boð á frumsýninguna en hún sé sem betur fer ekki langrækin. Fyrir öllu sé að aðstandendum kvikmyndarinnar vinsælu hafi tekist að gera Nálina ódauðlega og fræga.

Að neðan má sjá skemmtilega senu úr myndinni þar sem formaður húsfélagsins, leikinn af Felix Bergssyni, kemur að þeim bláa sem Tóti hefur lagt í tvö stæði. Formaðurinn, langþreyttur á veseni sem fylgir nágrannanum sem aldrei greiðir í húsfélagið en vill þó kaupa þrif því ekki nennir hann að taka þátt í þrifum á sameigninni, deyr ekki ráðalaus eins og sést í myndbandinu.