Breytt veiðigjaldafrumvarp lagt fram

Fram kemur í tilkynningu á vef stjórnarráðsins að frumvarpið hafi verið birt í samráðsgátt frá 25. mars til 3. apríl og að samtals hafi borist 112 umsagnir frá einstaklingum, fyrirtækjum, hagsmunaaðilum, sveitarfélögum, félagasamtökun og stofnunum.

Frá sveitarfélögum hafi komið umsagnir þar sem reifaðar voru áhyggjur um að hækkunin væri of brött og að skortur væri á greiningu á áhrifum frumvarpsins. Þá voru einnig lagðar til breytingar á frítekjumarki vegna áhrifa frumvarpsins á litlar og meðalstórar útgerðir.

Frítekjumark hækkað og ítarlegri samantekt í greinargerð

Í tilkynningunni segir að helstu breytingarnar sem gerðar hafi verið á frumvarpsdrögum að samráði loknu séu annars vegar að frítekjumark verði hækkað verulega. Frítekjumark í þorski og ýsu skuli þannig nema 40% af fyrstu 50 milljón króna álagningar veiðigjalds hvers árs hjá hverjum gjaldskyldum aðila. Með þessum breytingum er ætlað að áhrif frumvarpsins á litlar og meðalstórar útgerðir vegna hækkunar veiðigjalds mun minni en áður.

Einnig hafi verið brugðist við ábendingum um skort á mati á áhrifum. Þannig hafi verið mætt við greiningum í greinargerð frumvarpsins um áhrif frumvarpsins á um það bil hundrað stærstu fyrirtækin, áhrifamati á heildarskattlagningu sjávarútvegsfyrirtækja og ítarlegri samantekt um verðmyndun í Noregi.

17 milljarðar innheimtir 2026

Þá segir einnig að frumvarpið muni hafa jákvað áhrif á ríkissjóð. Tekjur af veiðigjaldi uppsjávarfiskstegunda hækki um þrjá til fjóra milljarða krón árlega og veiðigjald fyrir þorsk og ýsu hækki um fimm til sex milljarða króna árlega miðað við óbreytt aflamagn.

„Með þeim breytingum sem frumvarpið gerir ráð fyrir má áætla að álagt veiðigjald verði um 19,5 milljarðar árið 2026 en að teknu tilliti til frítekjumarks má áætla að innheimt veiðigjöld verði 17,3 milljarðar árið 2026. Án þeirrar leiðréttingar sem boðuð er samkvæmt frumvarpinu væri áætlað álagt veiðigjald um 11,2 milljarðar króna á grundvelli núgildandi laga. Frumvarpið gerir ráð fyrir að 30 stærstu sjávarútvegsfyrirtækin greiði 90% af veiðigjöldum að loknum breytingum,“ segir á vef stjórnarráðsins.

Gert er ráð fyrir að innheimt veiðigjald verði átján til nítján milljarðar á árunum 2027 til 2030. Í þeirri áætlun er gert ráð fyrir að gefinn verði út loðnukvóti. Óvissa sé þó um reiknistofn veiðigjalds þar sem hann byggist á afkomu fyrirtækja. Þá geti sveiflur á milli ára verið tilkomnar vegna breytinga á aflaverðmæti, kostnaði, gengi, aflamagni og skattalegra afskrifta og þannig haft áhrif á áætlanagerðina.