Tugir svekktra barna þurftu að snúa við á Kjalar­nesi

Í samtali við Vísi segir Auður Huld Kristjánsdóttir, aðstoðarskólastjóri Breiðagerðisskóla, segir að nú taki við bið eftir því að veðrinu sloti. Vindhviður á Kjalarnesi hafi mælst allt að 32  metrar á sekúndu. 

„Við vonum að við getum farið annað hvort í dag eða á morgun. Að hægt verði að fara í síðasta lagi í fyrramálið,“ segir Auður. 

Ljóst má vera að mörg barnanna hafi verið full tilhlökkunar fyrir ferðinni, sem fyrir mörgum börnum er hápunktur skólaársins í 7. bekk. Í skólabúðunum koma árgangar úr mismunandi skólum saman og verja þar fjórum dögum.

„Við ráðum víst ekki veðrinu og það eru margir svekktir, en svona er þetta.“

Mamma og pabbi bíða við símann

Þrátt fyrir að svekkelsið sé mikið hafi ekki verið neitt annað í stöðunni en að snúa við rútunni sem fara átti með börnin og kennara þeirra norður í Hrútafjörð.

„Við tökum engar áhættur með svona dýrmætan farm.“

Börnin hafi verið send heim, eftir að hafa skilið farangur sinn eftir í skólanum. 

„Nú bíða mamma og pabbi bara við símann eftir frekari fregnum,“ segir Auður. 

Jafnaldrar að norðan mættir á svæðið

Ferð barnanna styttist um það sem nemur frestun á brottförinni, en Auður segir lítið við því að gera annað en að skemmta sér þeim mun meira þegar á Reyki verður komið, áður en haldið verður heim á fimmtudag.

Á meðan bíði börn úr öðrum skólum þess að hitta jafnaldra sína úr Fossvoginum.

„Það eru aðrir skólar sem eru komnir, af því að þeir koma að norðan,“ segir Auður. 

„Því miður getum við ekkert að veðrinu gert, þó við vildum svo sannarlega fara.“