Ein­kunnir Ís­lands: Inn­koma Ísaks breytti leiknum

Byrjunarlið

Hákon Rafn Valdimarsson, markvörður [8]

Flott fyrsta varsla eftir þrumuskot á rammann á upphafsmínútunum. Átti aðra frábæra vörslu, skalli á markið af stuttu færi og snögg viðbrögð. Svartfellingar skoruðu síðan úr frákastinu, markið fékk ekki að standa en hefði gert það ef Hákon hefði ekki varið fyrsta skallann.

Hafði lítið að gera þess fyrir utan, en var öruggur í öllum sínum aðgerðum og úthlaupum og hélt markinu hreinu. 

Valgeir Lunddal Friðriksson, hægri bakvörður [7]

Búinn að eigna sér hægri bakvarðarstöðuna og er vel að henni kominn. Traustur varnarlega og á oft fína spretti sóknarlega þó hann sé ekki eins ógnandi og Logi hinum megin.

Sverrir Ingi Ingason, miðvörður [6]

Er stundum illa staðsettur, á það til að æða upp með sóknarmanni og fá boltann yfir sig. Gerðist rétt eftir að Ísland komst yfir og leiddi næstum því til jöfnunarmarks Svartfjallalands, en sem betur fer vann Guðlaugur vel undir hann og bjargaði málunum.

Markið hélst hreint samt sem áður og yfir því verður ekki kvartað.

Aron Einar Gunnarsson, miðvörður, spilaði of lítið til að fá einkunn

Byrjaði sem miðvörður í fyrsta landsleiknum í heilt ár en þurfti að víkja af velli vegna meiðsla eftir aðeins átján mínútur. Aron hélt um aftanvert lærið og mun ólíklega getað tekið þátt gegn Wales á þriðjudaginn.

Logi Tómasson, vinstri bakvörður [6]

Sótti upp vænginn og ógnaði sóknarlega. Fékk gult spjald fyrir óþarfa brot undir lok fyrri hálfleiks og verður því í banni gegn Wales á þriðjudag.

Stefán Teitur Þórðarson, miðjumaður [6]

Vallaraðstæður gerðu honum erfitt fyrir, boltinn rúllaði illa og skoppaði skringilega, erfitt að keyra upp völlinn til að taka þátt í sóknarleiknum eins og hann gerir oft svo vel.

Gerðist ekki sekur um mörg mistök en skapaði heldur ekkert. Var tekinn af velli á 68. mínútu fyrir Ísak Bergmann Jóhannesson. 

Arnór Ingvi Traustason, miðjumaður [7]

Þindarlaus og út um allt, endalaus vinnsla og dugnaður. Komst í hörkufæri og átti fast skot framhjá markinu eftir um hálftíma leik. Reyndi að sprengja upp í skyndisókn í upphafi seinni hálfleiks, var rifinn niður og fiskaði gult spjald á Svartfelling.

Jóhann Berg Guðmundsson, hægri kantmaður [6]

Sótti mikið inn á völlinn. Fékk fínt færi rétt fyrir hálfleik en náði ekki nógu góðu skoti. Var meira úti á kanti í fyrri hálfleik en var í raun orðinn miðjumaður í seinni hálfleik. Vildi komast á boltann og stýra spilinu.

Jón Dagur Þorsteinsson, vinstri kantmaður [5]

Gaf frábæra stungusendingu á Orra Stein og skapaði fyrsta dauðafæri leiksins eftir um tíu mínútur. Sást afar lítið til hans eftir það. Var tekinn af velli á 68. mínútu fyrir Mikael Egil.

Orri Steinn Óskarsson, framherji [8]

Klúðraði dauðafæri eftir rétt rúmar tíu mínútur. Völlurinn ekki að hjálpa og móttakan erfið en illa farið með frábært færi, skaut fyrst í varnarmann og svo í hliðarnetið. Fékk aftur góða stöðu í upphafi seinni hálfleiks, hitti þá á markið en það var varið. Andri Lucas var í hættulegu hlaupi og hefði eflaust þegið sendingu.

Það tókst þó í þriðju tilraun að koma boltanum í netið. Var vel staðsettur og kláraði færið af yfirvegun eftir flottan undirbúning.

Andri Lucas Guðjohnsen, framherji [6]

Fór afar lítið fyrir honum en átti flotta stoðsendingu í öðru marki Íslands.

Guðlaugur Victor Pálsson [6], kom inn á fyrir Aron Einar á 18. mínútu

Ekkert út á hans frammistöðu að setja. Leysti erfitt verkefni vel. 

Mikael Egill Ellertsson [7], kom inn á fyrir Jón Dag á 68. mínútu

Frábær innkoma, gaf stoðsendingu eftir aðeins örfáar mínútur inni á vellinum. Hefði verið hægt að skjóta í fljótfærni en dempaði boltann frekar fyrir Orra sem var í betra færi.

Fékk fína hlaupabraut og slapp næstum því einn í gegn í uppbótartíma en tókst ekki alveg að sleppa frá varnarmanni.

Maður leiksins - Ísak Bergmann Jóhannesson [8], kom inn á fyrir Stefán Teit á 68. mínútu

Var settur inn til að glæða sóknarleik liðsins nýju lífi og gerði það stórvel. Ógnaði með hlaupum fram á við og skapaði mikla hættu. Var maðurinn sem leitað var að í fyrsta marki Íslands, þó boltinn hafi ekki ratað til hans þá. Kom sér síðan í annað frábært færi og skoraði úr því rétt áður en leiknum lauk.

Gjörbreytti leiknum með sinni innkomu og er vel að valinu kominn.

Willum Þór Willumsson kom inn á fyrir Orra Stein á 90. mínútu

Spilaði of lítið til að fá einkunn.