Ten Hag rekinn frá Man. Utd

Ruud van Nistelrooy, fyrrverandi leikmaður United sem kom inn sem aðstoðarstjóri í sumar, mun taka við af Ten Hag og stýra United tímabundið.

Tap United gegn West Ham um helgina, 2-1, reyndist því síðasti leikur United undir stjórn Ten Hag. Eftir tapið er United aðeins í 14. sæti ensku úrvalsdeildarinnar.

Ten Hag tók við United árið 2022 og undir hans stjórn vann liðið enska deildabikarmeistaratitilinn á fyrsta tímabili, og enska bikarmeistaratitilinn síðastliðið vor.

Gengið í deildinni hefur hins vegar verið skelfilegt og endaði United í áttunda sæti á síðustu leiktíð, auk þess að falla úr leik í riðlakeppni Meistaradeildar Evrópu. Liðið er núna í Evrópudeildinni og hefur gert jafntefli í fystu þremur leikjum sínum þar.

Í yfirlýsingu frá United er Ten Hag þakkað fyrir hans störf og óskað velfarnaðar. Þar segir að Nistelrooy muni stýra liðinu tímabundið á meðan að nýr stjóri til lengri tíma verði fundinn.