Sá yngsti í haldi sautján ára og sá elsti fjörutíu ára

Þetta kemur fram í tilkynningu fra lögreglunni á höfuðborgarsvæðinu.

Þar segir að tugir lögreglumanna hafi unnið sleitulaust að rannsókn málsins, auk þess sem embættið hafi jafnframt notið góðrar aðstoðar annarra lögregluliða vegna þessa. Árásarmennirnir eru um þrjátíu talsins, „þótt þeir hafi haft sig mismikið í frammi,“ segir enn fremur í tilkynninunni.

„Ekki síst í ljósi þessa fjölda er um mjög umfangsmikla rannsókn að ræða, en þrjátíu hafa verið handteknir í þágu hennar. Sextán hafa enn fremur verið úrskurðaðir í gæsluvarðhald vegna málsins, ýmist í eina viku eða tvær, en einum hefur verið sleppt. Núna eru tíu í haldi lögreglu, en sá yngsti þeirra er sautján ára en sá elsti er á fertugsaldri. Fáheyrt er að svo margir sitji í gæsluvarðhaldi í einu og sama málinu.“

Samhliða eru til rannsóknar tilvik um hótanir og skemmdarverk á íbúðarhúsnæði undanfarna daga, sem talin eru tengjast árásinni í miðborginni, og eru þau sögð hafa skapað mikla hættu. 

„Eftir að málið kom upp hefur lögreglan aukið viðbúnað sinn og svo verður áfram og munu þess til dæmis sjást merki um komandi helgi vegna þeirra hótana sem settar hafa verið fram.“

Þá segir í tilkynningunni að lögreglan skoði hvernig myndefni af árásinni í miðborginni rataði í fjölmiðla og hvort starfsmaður hennar hafi átt þar hlut að máli. Slíkt er litið alvarlegum augum og er það til rannsóknar hjá embætti héraðssaksóknara, sem var þegar gert viðvart vegna þessa.