Fótbolti

„Mjög gott lið og þetta verður svakalegur leikur“

Sindri Sverrisson skrifar
Davíð Snorri Jónasson er þjálfari U21-landsliðsins og hefur þegar tekið þátt í einni lokakeppni EM, þegar hann var nýorðin þjálfari liðsins árið 2021.
Davíð Snorri Jónasson er þjálfari U21-landsliðsins og hefur þegar tekið þátt í einni lokakeppni EM, þegar hann var nýorðin þjálfari liðsins árið 2021. vísir/Arnar

„Hér eru leikmenn framtíðarinnar að spila, úrslitaleik á heimavelli. Þetta eru efnilegir strákar sem að munu spila góða rullu fyrir íslenska landsliðið í framtíðinni. Það er tími til að koma hingað [í dag] og horfa á tvö góð lið og flotta leikmenn spila fótbolta.“

Þetta segir Davíð Snorri Jónasson, þjálfari U21-landsliðs karla í fótbolta, en liðið mætir Tékklandi klukkan 16 á Víkingsvelli í umspili um sæti í lokakeppni EM.

Íslensku strákunum tókst með dramatískum hætti að skjóta sér upp fyrir Grikkland og inn í umspilið, og er nú aðeins leikjunum tveimur við Tékka frá því að komast á EM í þriðja sinn í sögu íslenska U21-landsliðsins.

„Hljóðið er mjög gott í mönnum. Þeir eru einbeittir og það er mikil gleði og yfirvegun í hópnum. Ég hlakka til að sjá okkur spila fyrir framan geggjaða íslenska áhorfendur [í dag],“ segir Davíð Snorri en hann ræddi við Vísi fyrir æfingu í gær. Tékkarnir hafa hins vegar sýnt hversu öflugir þeir eru.

„Möguleikarnir eru bara góðir“

„Þetta er mjög gott lið. Kraftmikið lið. Þeir eru tilbúnir í að pressa okkur og geta blandað sóknarleiknum sínum með bæði stuttu spili og löngum sendingum ef þess þarf. Við erum búnir að undirbúa okkur vel og verðum klárir. Þetta er mjög gott lið og þetta verður svakalegur leikur,“ segir Davíð Snorri sem hefur hins vegar fulla trú á sínu liði:

„Ég er mjög ánægður með hópinn og hef verið það í gegnum alla keppnina. Möguleikarnir eru bara góðir. Ég held að þetta verði jafnt og muni ráðast á litlum atriðum, og við erum undirbúnir fyrir það að vera mjög góðir í einföldu hlutunum.“

Klippa: Davíð Snorri um leikina sem gætu komið Íslandi á EM

Útskýrði valið á markverði í stað varnarmanns

Frá því að Davíð Snorri kynnti landsliðshóp sinn síðasta föstudag hefur hann þurft að gera tvær breytingar vegna meiðsla. Kristall Máni Ingason og Finnur Tómas Pálmason urðu að draga sig út úr hópnum en Davíð kallaði á Svein Margeir Hauksson í stað Kristals og svo óvænt markvörðinn Ólaf Kristófer Helgason fyrir miðvörðinn Finn. Davíð segir það þó eiga sér eðlilegar skýringar en í hópnum sem valinn var á föstudag voru aðeins tveir markverðir:

„Ég var búinn að tala við Óla í síðustu viku um að vera með okkur. Hann er búinn að vera að æfa með okkur og hugmyndin var alltaf að gera breytingu fyrir seinni leikinn, til að taka þrjá markmenn með út. Fyrst við þurftum að gera breytingu núna þá gerðum við þetta bara strax. Sveinn Margeir er svo búinn að standa sig mjög vel í góðu liði KA, er ferskur og kemur á fullri ferð inn.“


Tengdar fréttir

„Erum með íslensku þjóðina á bakvið okkur hérna“

„Við erum með mjög gott lið og höfum fulla trú á okkur sjálfum. Við vitum hvað við getum gert sem lið, keyrum á þá og gerum okkar allra besta til að ná í úrslit,“ segir framherjinn ungi Orri Óskarsson fyrir einvígið við Tékkland sem hefst í dag.

„Eigum stóran séns á að gera vel“

Kristian Nökkvi Hlynsson segir að leikmenn íslenska U-21 árs landsliðsins í fótbolta mæti brattir til leiks gegn Tékkum í umspili um sæti á EM á næsta ári. Hann unir hag sínum hjá Ajax vel.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.