Fótbolti

Barcelona skilaði tæplega 14 milljarða gróða

Valur Páll Eiríksson skrifar
Lewandowski var skráður í tæka tíð eftir miklar vangaveltur í sumar. Hann hefur skorað átta mörk í sex deildarleikjum fyrir liðið.
Lewandowski var skráður í tæka tíð eftir miklar vangaveltur í sumar. Hann hefur skorað átta mörk í sex deildarleikjum fyrir liðið. Urbanandsport/NurPhoto via Getty Images

Spænska knattspyrnuliðið Barcelona hefur tilkynnt um tæplega 100 milljón evra gróða á síðasta ári. Samkvæmt áætlunum verður gróðinn rúmlega tvöfalt meiri á næsta ári.

Fjárhagsörðugleikar Barcelona hafa farið framhjá fáum en liðið var í miklum vandræðum með að skrá nýja leikmenn til leiks fyrir yfirstandandi leiktíð sökum fjárhagsreglna spænsku úrvalsdeildarinnar. Félagið hafði skilað um 480 milljón evra tapi árið áður.

Þökk sé aðgerðum stjórnar félagsins í sumar, þar sem félagið hefur selt rétt á framtíðartekjum, hefur dæmið snúist við. Tíminn á eftir að leiða í ljós áhrifin á félagið á næstu árum þegar þær tekjur skila sér ekki, fyrir skammtímagróða sumarsins til að leiða félagið út úr verstu öngstrætunum.

Í tilkynningunni um gróðann sem birt var í dag segir þó að félagið búist við 273 milljón evra gróða á næsta ári, sem jafngildir tæplega 39 milljörðum króna.

Barcelona seldi framtíðartekjur af sjónvarpsrétti sínum og stóran hlut í framleiðslufyrirtæki félagsins, Barca Studios. Í ágúst seldi félagið tæplega fjórðungshlut í Barca Studios til fjölmiðlafyrirtækisins Orpheus Media fyrir 100 milljónir evra.

Það dugði til þess að félagið gat skráð leikmenn á við Jules Koundé, Robert Lewandowski og Raphinha í leikmannahóp sinn, en þeir höfðu þá verið samningsbundnir félaginu um hríð án þess að vera skráðir til leiks.

Barcelona er sem stendur í 2. sæti spænsku úrvalsdeildarinnar með 16 stig eftir sex leiki, tveimur stigum frá toppliði Real Madrid.




Fleiri fréttir

Sjá meira


×