Innlent

Eld­ræða Kristínar Tómas­dóttur: „Þið eruð að pakka þessu inn í ó­skiljan­legar tölur“

Hallgerður Kolbrún E. Jónsdóttir skrifar
Kristín Tómasdóttir gagnrýndi borgarfulltrúa harðlega.
Kristín Tómasdóttir gagnrýndi borgarfulltrúa harðlega. Vísir/Vilhelm

Kristín Tómasdóttir, sem farið hefur fyrir hópi foreldra í mótmælum í ráðhúsi Reykjavíkur vegna neyðarástands sem skapast hefur í leikskólamálum, segir tillögur meirihlutans sem kynntar voru í dag ekki nægja. Þar sé engin svör að fá um hvenær börnin þeirra komist á leikskóla. 

Meirihlutinn í borginni kynnti eftir hádegi í dag tillögur borgarráðs að bráðaaðgerðum í leikskólamálum. Tillögurnar voru sex og ein þeirra að opna Ævintýraborg í Öskjuhlíð fyrr en áætlað var. 

Kristín Tómasdóttir gekk í pontu að lokinni kynningunni og sagði foreldra fagna fundinum og að hægt væri að sýna þeim einhverjar tillögur til að bregðast við vandanum sem hefði skapast. Það væri hins vegar ekki nóg. 

Foreldrar hafa undanfarnar vikur ítrekað mikilvægi þess að börn þeirra fái pláss á leikskóla.Vísir/Vilhelm

„En okkur þykir það mjög miður og mikil vanvirðing við okkur að við þurfum að eyða kröftunum okkar í að mæta hingað vikulega til að þrýsta á að þið vinnið vinnuna ykkar. Þið vinnið vinnuna ykkar fyrir útsvar sem við greiðum borginni. Við viljum að peningurinn okkar fari í grunnþjónustu svo að samfélagið geti fúnkerað,“ sagði Kristín. 

„Þið ætluðuð ekki að sinna þessu“

Samfélagið gengi ekki eðlilega á meðan staðan væri svona í leikskólamálum. 

„Við getum ekki farið í vinnuna okkar vegna þess að þið eruð ekki búin að vinna vinnuna ykkar. Því miður. Við sjáum það best á því að þið eruð að kynna hérna tillögur sem áttu ekki að vera kynntar. Þið ætluðuð ekki að sinna þessu,“ sagði Kristín.

„Þið ætluðuð að láta okkur hlusta á svör um að það væru ekki til frekari tillögur í þessum málum, það væri ekki hægt að opna Ævintýraborgir við Nauthólsveg fyrr en eftir dúk og disk. Það ætti ekki að vera hægt og við áttum bara að sýna því skilning.“

Nóg er um að vera í ráðhúsinu og ljósmyndari Vísis vekur hér greinilega áhuga þessa barns.Vísir/Vilhelm

Þá gagnrýndi hún fulltrúa í borgarráði fyrir að hafa ekki rætt við foreldrana sem mættu með börnin sín í ráðhúsið í morgun. 

„Mér finnst það bæði kæruleysi og dónaskapur við okkur og mér finnst líka leiðinlegt að við mætum hérna klukkan 8:45 með börnin okkar, 18 mánaða og yngri og meirihlutinn sér sé ekki fært að koma og tala við okkur. Meirihluti borgarráðs gengur meðfram veggjum og lætur sig hverfa inn í borgarráðsherbergi og talar ekki við okkur,“ sagði Kristín. 

Einar ekki orðinn sófakartafla í stjórnsýslukerfinu

Hún hrósaði þó því að Einar Þorsteinsson einn í meirihluta hafi rætt við foreldrana.

„Sem ert ekki orðin sófakartafla í þessu stjórnsýslukerfi, því þú ert nýkominn inn í þessa pólitík og ég vona bara að þessi kraftur haldi áfram í kring um þig og þú þjappist ekki inn í þetta kerfi sem er ekki að gera nokkurn skapaðan hlut.“

Þá gagnrýndi hún framsetningu tillaganna. Of mikið væri um tölur og orð sem þýddu ekkert fyrir foreldrana sem mættir væru til að fá svör. 

„Við erum ekki áhugafólk um skipulag og innritun í leikskólum í Reykjavík. Við erum hvorki áhugafólk né sérfræðingar um það. Það að einhver sextíu pláss opni á Kirkjusandi 2023 segir mér ekki hvenær barnið mitt kemst inn á leikskóla. Alls ekki,“ sagði Kristín og sagði engin svör felast í þessari kynningu fyrir hana sjálfa. 

Foreldrar og börn spjalla við fulltrúa í borgarráði.Vísir/Vilhelm

„Eina dagsetningin sem við höfum í þessum er í byrjun september varðandi Ævintýraborgir. Mitt barn er rosalega aftarlega á biðlista í aðlögun í Ævintýraborgum við Nauthólsveg og það er fætt í mars 2021. Það segir okkur að Ævintýraborgir við Nauthólsveg losa okkur foreldra barna 18 mánaða og eldri undan þessu bulli sem hefur verið upp á síðkastið,“ sagði Kristín. 

„En eftir standa rosalega mörg börn og foreldrar barna frá 12 mánaða upp í 18 mánaða. Hér í þessum tillögum eru engin svör um nákvæmlega hvenær við fáum pláss. Við erum búin að vera útsjónasöm, við erum búin að reikna með því að þið ætlið að gefa okkur pláss núna, 1. september.“

Vill niðurgreiðsluna til foreldra

Hún benti á að foreldrar í salnum hefðu fengið bréf í marsmánuði þess efnis að börn þeirra fengju pláss á leikskóla 1. september næstkomandi. 

„Þið eruð að plata okkur og þið eruð að pakka þessu inn í óskiljanlegar tölur. Það eru engar dagsetningar hérna, það eru engin bein svör. Mér finnst rosalega leiðinlegt að þurfa að vera svona hörð og þurfa að eyða kröftunum mínum í að vera hér og sýna ykkur aðhald,“ sagði Kristín.

Fjöldi foreldra barna, sem hafa ekki fengið inn á leikskóla í Reykjavík, er saman kominn í ráðhúsinu.Vísir/Vilhelm

Hún hvatti borgarfulltrúana til að útfæra enn betri tillögur í næstu viku og sagðist sakna einnar tillögu. 

„Það er að þið takið peningana sem er búið að eyrnamerkja hverju einasta barni, 300 þúsund krónur í niðurgreiðslu, og afhendið börnunum okkar þennan pening á meðan við sýnum útsjónarsemi og finnum dagvistun fyrir þau fyrir þann pening.“

Einar Þorsteinsson oddviti Framsóknar í borginni svaraði athugasemdum Kristínar í kjölfarið en hlusta má á ræðu hennar og svör Einars í spilaranum hér að neðan.


Tengdar fréttir

Stefnt á að opna Ævin­týra­borg strax í septem­ber

Meirihlutinn í borginni hefur kynnt tillögur sínar, sem voru samþykktar á borgarráðsfundi nú um hádegisbil, að bráðaaðgerðum í leikskólamálum. Tillögurnar eru sex, þar á meðal að opna Ævintýraborg í Öskjuhlíð strax í september. 

Reiknar með áherslu á Ævintýraborgirnar

Ráðhús Reykjavíkur hefur frá því í morgun verið undirlagt foreldrum með börn á leikskólaaldri, sem mótmæla ástandi í leikskólamálum borgarinnar. Meirihlutinn mun kynna tillögur að bráðaaðgerðum að loknum borgarráðsfundi á eftir. Fulltrúi Sjálfstæðisflokksins í ráðinu býst við áherslu á Ævintýraborgirnar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×