Daníel Leó í liði umferðarinnar í Póllandi

Daníel gekk í raðir Slask Wroclaw frá enska félaginu Blackpool á Englandi í janúar á þessu ári, en hann skoraði sigurmark liðsins gegn Pogon Szczecin um helgina. Daníel og félagar unnu leikinn 2-1 og var þetta fyrsta mark Daníels fyrir félagið.

Það er pólska úrvalsdeildin sem birti lið umferðarinnar og þar má sjá Daníel í stöðu miðvarðar. Hann er eini leikmaður Slask Wroclaw sem er valinn í liðið.

Daníel og félagar hafa byrjað tímabilið á einu jafntefli og einum sigri og eru því með fjögur stig eftir fyrstu tvær umferðirnar. Á seinasta tímabili endaði liðið í 15. sæti, einu sæti fyrir ofan fallsvæðið.