Fullyrða að Hörður Björgvin sé á leið til Panathinaikos

Það er Fótbolti.net sem greinir frá þessu, en vefmiðillinn segist hafa öruggar heimildir fyrir þessu.

Hörður Björgvin yfirgaf rússneska liðið CSKA Moskvu á dögunum eftir að hafa leikið með liðinu í fjögur ár, en hann er nú á leið til Grikklands.

Samkvæmt heimildamönnum Fótbolta.net höfðu fleiri lið áhuga á því að fá Hörð í sínar raðir. Þar á meðal bauðst honum nýr samningur hjá CSKA Moskvu, en Hörður ákvað að halda frekar á vit nýrra ævintýra.

Panathinaikos hafnaði í fjórða sæti grísku deildarinnar á seinustu leiktíð. Þá varð liðið bikarmeistari í nítjánda sinn, en Hörður verður annar Íslendingurinn til að spila fyrir félagið. Helgi Sigurðsson, aðstoðarþjálfari Vals, lék með liðinu frá 1999 til 2001.

Þá verður Hörður ekki eini Íslendingurinn í grísku deildinni því markvörðurinn Ögmundur Kristinsson er leikmaður Olympiacos. Báðir eru þeir uppaldir hjá Fram og léku saman frá 2009 til 2010.