Fótbolti

Sigrar hjá Kristian­stad og Kalmar | Jafn­t í toppslagnum

Runólfur Trausti Þórhallsson skrifar
Guðrún Arnardóttir var eini Íslendingurinn sem tók þátt í toppslag deildarinnar.
Guðrún Arnardóttir var eini Íslendingurinn sem tók þátt í toppslag deildarinnar. @FCRosengard

Fjórir leikir fóru fram í sænsku úrvalsdeild kvenna í fótbolta. Íslenskar landsliðskonur voru í eldlínunni þó báðir íslensku leikmenn meistaraliðs Häcken hafi verið fjarri góðu gamni.Nokkrar íslenskar fótboltakonur voru í eldlínunni þó hvorki Agla María Albertsdóttir né Diljá Ýr Zomers verið með Häcken gegn Rosengård.

Häcken og Rosengård gerðu 2-2 jafntefli í uppgjöri toppliða deildarinnar. Guðrún Arnardóttir lék allan leikinn í hjarta varnar gestanna. Þær Agla María Albertsdóttir og Diljá Ýr Zomers voru hins vegar fjarri góðu gamni.

Eftir jafntefli dagsins eru bæði lið sem fyrr á toppi deildarinnar, nú með 11 stig að loknum fimm umferðum.

Amanda Andradóttir var í byrjunarliði Kristianstad sem vann 1-0 heimasigur á Linköping. Spilaði Amanda 87 mínútur á meðan Emelía Óskarsdóttir sat allan tímann á varamannabekk liðsins. 

Elísabet Gunnarsdóttir er sem fyrr þjálfari Kristianstad sem situr í 6. sæti með átta stig.

Hallbera Guðný Gísladóttir lék allan leikinn er Kalmar vann 1-0 heimasigur á Brommapojkarna. Var þetta annar sigur Kalmar á leiktíðinni og liðið nú í 10. sæti með sex stig.

Þá vakti athygli að landsliðskonan fyrrverandi Guðbjörg Gunnarsdóttir var á bekk Eskilstuna er liðið tapaði 2-0 gegn Djurgården. Guðbjörg er markmannsþjálfari liðsins en hefur greinilega brugðið sér í hlutverk varamarkvarðar í dag. Eskilstuna situr í 8.sæti með sjö stig.

Fréttin hefur verið uppfærð. Upphaflega stóð að Amanda hafi ekki verið í leikmannahóp Kristianstad en það var ekki rétt.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.