Veður

Kröpp lægð veldur hvass­viðri með snjó í nótt og á morgun

Atli Ísleifsson skrifar
Í nótt og fyrramálið gengur kröpp lægð til norðurs fyrir vestan land og veldur hún suðaustan hvassviðri eða stormi um tíma í flestum landshlutum með snjókomu eða slyddu.
Í nótt og fyrramálið gengur kröpp lægð til norðurs fyrir vestan land og veldur hún suðaustan hvassviðri eða stormi um tíma í flestum landshlutum með snjókomu eða slyddu. Vísir/Vilhelm

Lægðin sem stjórnaði veðrinu í gær er enn á Grænlandshafi en hún hefur grynnst töluvert. Veðrið verður því áfram svipað en vindurinn þó öllu minni, suðvestan átta til fimmtán metrar á sekúndu og éljagangur, en yfirleitt þurrt um landið norðaustanvert.

Í hugleiðingum veðurfræðings á vef Veðurstofunnar segir að frost verði á bilinu núll til fimm stig í dag.

Í nótt og fyrramálið gengur svo kröpp lægð til norðurs fyrir vestan land og veldur hún suðaustan hvassviðri eða stormi um tíma í flestum landshlutum með snjókomu eða slyddu.

„Á morgun snýst svo í allhvassa eða hvassa suðvestanátt með talsverðum éljagangi, en það styttir smám saman upp norðaustantil á landinu.

Í nótt og á morgun geta því víða skapast varasamar aðstæður til ferðalaga,“ segir í hugleiðingum veðurfræðings.

Spákortið fyrir klukkan 14 í dag.Veðurstofan

Veðurhorfur á landinu næstu daga

Á fimmtudag: Suðaustan hvassviðri eða stormur um morguninn og snjókoma um tíma í flestum landshlutum. Snýst síðan í suðvestan 13-20 m/s með éljum, en styttir upp NA-til. Frost 0 til 4 stig.

Á föstudag: Minnkandi suðvestanátt og él, en þurrt NA-til á landinu. Hiti um og undir frostmarki. Snjókoma eða slydda á S- og A-landi undir kvöld.

Á laugardag: Suðvestan og vestan 5-13 og dálítil él. Snjókoma eða rigning á A-verðu landinu um morguninn, en birtir síðan til þar. Hiti áfram svipaður, en hlýnar við SA-ströndina.

Á sunnudag: Hægur vindur um morguninn, bjart að mestu og vægt frost. Suðaustan 5-13 seinnipartinn og hlýnar með dálítilli rigningu eða slyddu, en þurrt að kalla NA-lands.

Á mánudag og þriðjudag: Suðaustanátt og súld eða dálítil rigning, en þurrt á N- og A-landi. Hiti 3 til 9 stig.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.