Myndband sýnir Grímsá ryðjast yfir stíflugarð og þurrka út handrið

Myndband úr öryggismyndavél í virkjuninni sýnir hvernig klakinn ryðst smám saman yfir garðinn til vinstri á mynd. Ísinn byrjar að byggjast upp strax í byrjun myndbandsins.

Síðar í myndbandinu má svo sjá ána sjálfa í miklum ham, rennslið eykst og mikill klaki ferðast með ánni fram hjá stíflugarðinum. Eftir um sex mínútur af myndbandinu er rennslið hvað mest.

Var niðri á garðinum nokkrum mínútum áður

Mikil úrkoma og hlýindi hafa verið á Austurlandi síðustu daga og leysingar miklar eftir því. Pálmi Hreinn Sigurðsson verkefnastjóri virkjana Orkusölunnar á Austurlandi segir það gerast reglulega að áin flæði yfir stíflugarðinn. Þetta hafi þó verið með allra mesta móti á föstudag.

Aðspurður segir hann starfsmenn virkjunarinnar oft leggja leið sína út á stíflugarðinn, þar sem áin ruddist yfir. Sjálfur hafi hann til dæmis verið þarna niðri nokkrum mínútum áður en allt fór af stað.

Meðalrennsli í Grímsá er um 13 rúmmetrar á sekúndu. Rennslið í ánni mældist mest 900 rúmmetrar á sekúndu þegar hún flæddi yfir garðinn á föstudag.