„Ég á engin orð til þess að lýsa tilfinningum mínum“

Elísabet Inga Sigurðardóttir skrifar 27. febrúar 2022 23:01

Úkraínsk kona var hrærð yfir stuðningi Íslendinga á mótmælunum í dag. vísir

Mörghundruð manns sýndu Úkraínumönnum samstöðu og mótmæltu stríðinu í miðbæ Reykjavíkur í dag. Mótmælendur kröfðust þess að rússneski sendiherrann yrði sendur heim og fordæmdu Rússlandsforseta.

Boðað var til mótmæla og samstöðufunda í Reykjavík, á Akureyri og Reyðarfirði í dag vegna stríðsins. Mótmælendur krefjast þess að gripið verði til vopnahlés í Úkraínu og að hermenn Rússa og Hvít-rússa dragi sig frá landinu.

„Stöðvið stríðið“ stóð á mörgum skiltum.elísabet

„Það eru tuttugu mínútur liðnar af samstöðufundinum og fólk streymir enn hér að. Ég myndi giska á að það væru 500-600 manns á svæðinu. Hér er fólk með skilti og á þeim stendur: Stöðvum Pútín, stöðvum Rússa, burt með Pútín. Hér er fólk að sýna samstöðu með Úkraínumönnum.“

„Það er bara hræðilegt að lesa fréttir. Þetta er algjör skelfing. Hjálparleysið og finnast maður ekki geta gert neitt,“ sagði Matthildur Magnúsdóttir.

Úkraínsk kona var hrærð yfir stuðningnum í dag.

„Þetta er bara algjör hryllingur sem er að gerast núna. Ég vissi að fjölmiðlafólk yrði á staðnum og ég hugsaði hvað ég gæti sagt en ég á engin orð til þess að lýsa tilfinningum mínum.“

Hugsar til móður í Kænugarði

Móðir hennar er stödd í Kænugarði og dvelur að mestu í neðanjarðarlestarstöðvum.

„Hún situr bara í kjallaranum og ég er búin að sýna henni stuðninginn og ég vil þakka Íslendingum kærlega fyrir stuðninginn af því að við, Úkraínumenn sem erum á Íslandi, við getum ekki gert neitt. Við vitum ekki hvað við getum gert og það er verst.“

Mótmælin voru fjölmenn og lögreglan á staðnum.elísabet

Af hverju eruð þið hérna í dag?

„Til að mótmæla rússneska sendiherranum,“ sagði Inga Jóna Haarde Vignisdóttir.

„Maður vill hjálpa eins mikið og hægt er en það er erfitt,“ sagði Hedda Morén.

„Hættiði stríði, Úkraína þarf að lifa,“ sagði Eva Bryndís Ragnheiðardóttir.

Kisa sýndi líka samstöðu. Að sjálfsögðu í peysu enda kalt í veðri.elísabet

Innrás Rússa í Úkraínu Rússland Úkraína Reykjavík

Tengdar fréttir

Á sjötta hundrað mótmæla við sendiráðið og enn bætir í

Fólk streymir að rússneska sendiráðinu í Túngötu þar sem fólk mótmælir nú rússneskum stjórnvöldum og innrás þeirra í Úkraínu. Á sjötta hundrað eru þegar við sendiráðið og lögreglufulltrúi á staðnum segir enn bætast í hópinn.

27. febrúar 2022 13:00

Boða til mótmæla um allt land í dag

Boðað hefur verið til mótmæla- og samstöðufunda í Reykjavík, á Akureyri og Reyðarfirði í dag vegna innrásar Rússa inn í Úkraínu.

27. febrúar 2022 10:17

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir