Fella niður kennslu fyrir austan

Síðustu tvo sólarhringa greindust um þrjátíu smitaðir á Austurlandi en mörg þeirra sem hafa smitast tengjast skólastarfi í bæjunum þremur, samkvæmt tilkynningu frá Lögreglunni á Austurlandi.

„Staðan í faraldrinum er því orðin verulega þung og farin að reyna á víða í samfélaginu hér á Austurlandi. Þá hafa smit áhrif á starfsemi og mönnun í heilbrigðiskerfinu þar sem má lítið út af bregða til þess að þjónusta skerðist verulega,“ segir í tilkynningu lögreglunnar.

Þar segir einnig að þörf á aðgerðum sé ljós.

Með því að fella niður kennslu er vonast til þess að draga megi úr útbreiðslu kórónuveirunnar og létta álag á heilbrigðiskerfinu. Staðan varðandi skólana verði svo tekin um helgina.

Foreldrar og forráðamenn eru hvattir til að fylgjast með tilkynningum um áframhaldið eftir helgi. Þá hvetur aðgerðastjórnin íþróttafélög til að fella niður íþróttaæfingar fram yfir helgina.

Í öðrum skólum Fjarðabyggðar og Austurlands er ástandið talið betra og því ekki ástæða til að fella niður kennslu. Í tilkynningunni segir að áfram verði fylgst náið með stöðunni á hverjum stað fyrir sig.