Innlent

MAST lýkur rannsókn á meðferð blóðtökuhryssa og vísar til lögreglu

Eiður Þór Árnason skrifar
Heimildarmynd dýraverndunarsamtakanna TSB Tierschutzbund Zurich og AWF Animal Welfare Foundation hefur vakið mikla umræðu. 
Heimildarmynd dýraverndunarsamtakanna TSB Tierschutzbund Zurich og AWF Animal Welfare Foundation hefur vakið mikla umræðu.  Skjáskot

Matvælastofnun (MAST) hefur lokið rannsókn sinni á meintri illri meðferð á blóðtökuhryssum sem sást í myndbandi sem birt var af erlendum dýraverndunarsamtökum. Hefur málinu nú verið vísað til lögreglu ásamt fyrirliggjandi gögnum.

Fram kemur í tilkynningu frá MAST að sérfræðingar stofnunarinnar hafi farið ítarlega yfir myndbandið og greint þau atvik sem talin eru brjóta í bága við lög um velferð dýra og metið áhrif þeirra á hryssurnar. Rannsókn hafi jafnframt leitt í ljós hvar atvikin áttu sér stað og hvaða fólk átti hlut að máli, en þær upplýsingar komu ekki fram í umræddu myndbandi.

Vildu ekki veita upplýsingar um bændurna

Dýraverndarsamtökin Animal Welfare Foundation (AWF) og Tierschutzbund Zürich (TBZ) birtu myndbandið á Youtube þann 22. nóvember síðastliðinn. Matvælastofnun óskaði eftir upplýsingum um hvar og hvenær myndböndin hafi verið tekin upp auk þess sem óskað var eftir óklipptu myndefni til að nota við rannsóknina.

Höfnuðu samtökin því í opnu bréfi þann 1. desember að afhenda óklippt efni og tilgreina tökustaði en gáfu upp tökudaga myndbandsins.

„Við rannsóknina leitaði stofnunin eftir skýringum og afstöðu fólksins til þess sem fram kemur í myndböndunum. Eins og áður segir hefur stofnunin ekki aðgang að óklipptu myndefni sem takmarkar möguleika hennar á að meta alvarleika brotanna og gerir stofnuninni því ókleift að rannsaka málið til fullnustu,“ segir í yfirlýsingu MAST.

Slegnar og barðar með prikum

Blóðmerarhald hefur lengi verið við lýði á Íslandi, en blóðið er tekið úr fylfullum merum og notað til að auka frjósemi svína til manneldis með hormóninu PSMG.

Í myndbandi dýraverndunarsamtakanna má sjá hryssur lokaðar inni í þröngri stíu og þær meðal annars slegnar og barðar með prikum.  Sigríður Björnsdóttir, dýralæknir hrossasjúkdóma hjá Matvælastofnun, sagði skömmu eftir birtingu myndbandsins að MAST liti málið mjög alvarlegum augum

„Við höfum séð þetta myndband og svo virðist sem meðferðin á hryssunum eins og hún kemur fram á þessu myndbandi stangist verulega á við þau starfsskilyrði sem eru í þessari grein,” sagði Sigríður og bætti við að myndin væri ekki lýsandi fyrir blóðmerarhald á Íslandi.

Svandís Svavarsdóttir, sjávarútvegs- og landbúnaðarráðherra, hefur skipað starfshóp sem hefur það hlutverk að fjalla um blóðtöku á fylfullum hryssum. Er hópnum ætlað að skoða starfsemina, regluverkið og eftirlitið í kringum hana og skila af sér niðurstöðum fyrir 1. júní.

Líftæknifyrirtækið Ísteka tilkynnti í desember að það hafi rift samningum við bændur sem sýndir voru fara illa með hross við blóðtöku í myndbandinu. Ísteka er eina fyrirtækið hér á landi sem kaupir blóð af blóðmerabændum.


Tengdar fréttir

Búin að skipa starfs­hóp til að skoða blóð­mera­hald

Svandís Svavarsdóttir, sjávarútvegs- og landbúnaðarráðherra hefur skipað starfshóp sem hefur það hlutverk að fjalla um blóðtöku á fylfullum hryssum. Mun hópurinn hefja störf á næstu dögum en honum er ætlað að skoða starfsemina, regluverkið og eftirlitið í kringum hana.

„Ég myndi sjálf berja þann sem legði hendur á mín hross“

„Ég er mjög ósátt við þetta myndband. Þarna birtast myndir heiman frá mér, og ekkert af minni starfsemi tengist því sem kemur fram í myndbandinu,“ segir Sæunn Þórarinsdóttir, hrossabóndi um myndband sem birt var í morgun af slæmri meðferð mera við blóðtöku.

Rannsaka slæma meðferð á fylfullum hryssum við blóðtöku

Matvælastofnun hefur til rannsóknar myndband sem sýnir slæma meðferð á fylfullum hryssum við blóðtöku. Dýralæknir hrossasjúkdóma segir að málið sé litið mjög alvarlegum augum, en að meðferðin sé ekki lýsandi fyrir blóðmerarhald á Íslandi.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.