Veður

„Ekki fyrr en seint í dag sem lægðin fjar­lægist á­kveðið og grynnist“

Atli Ísleifsson skrifar
Veðurfræðingur segir að þó að það versta sé afstaðið þá sé hálfgert leiðinda hvassvirði áfram nokkuð víða á landinu.
Veðurfræðingur segir að þó að það versta sé afstaðið þá sé hálfgert leiðinda hvassvirði áfram nokkuð víða á landinu. Vísir/Vilhelm

Veðurfræðingur á Veðurstofunni segir að eftir storminn í nótt sé lægðin nú í kyrrstöðu vestan við landið. Spáð er leiðindaveðri í dag, með minnkandi suðaustanátt en öllu hvassara á Vesturlandi.

Þetta segir Teitur Arason veðurfræðingur í samtali við fréttastofu. „Þó að það versta er afstaðið þá er hálfgert leiðinda hvassvirði hérna áfram nokkuð víða á landinu núna fram eftir degi. Það er ekki fyrr en seint í dag sem lægðin fjarlægist ákveðið og grynnist og þegar líður á kvöldið er komið rólegt veður á öllu landinu.“

Hann segir að í gærkvöldi hafi skilin gengið á landið með suðaustan stormi eða roki á Suður- og Vesturlandi og jafnvel verið enn hvassara sums staðar þar sem veður hafi magnast upp vegna áhrifa landslags. „Þessu fylgdi rigning og stormurinn geisaði í alla nótt en núna undir morgun fór að draga úr. Það versta er afstaðið í þessum töluðu orðum [um klukkan 6:30].“

Teitur segir veðrið hafa verið verst á suðvesturhorni landsins.

Það var talað um að þetta yrði ein dýpsta lægð það sem af er þessari öld. Stóðst það?

„Þetta var mjög djúp lægð. Miðja hennar var 931 millibar, um 500 kílómetra vestsuðvestur af Reykjanesi. Sem betur fer kom miðjan ekki mjög nærri og þess vegna var veðrið ekki verra en það var í nótt. Svona veður er samt alltaf líklegt til að valda tjóni. En það er líklega alltaf eitthvað tjón þegar veðrið er svona,“ segir Teitur.

Spákorið fyrir klukkan 13.Veðurstofan

Veðrið í dag og á morgun

Veðurstofan spáir minnkandi suðaustanátt, tíu til átján metrum á sekúndu nærri hádegi, en fimmtán til 23 á Vesturlandi. Úrkomulítið norðanlands en annars rigning með köflum og talsverð úrkoma á Austfjörðum og Suðausturlandi fram eftir degi. Hiti verður á bilinu tvö til sjö stig. Lægir talsvert í kvöld og kólnar.

Á morgun sé svo meinlítil sunnanátt í kortunum. „Dálítil rigning eða slydda sunnan- og vestanlands og hiti 0 til 5 stig. Þurrt og bjart á Norður- og Austurlandi með frosti á bilinu 0 til 5 stig.

Annað kvöld hvessir af austri á sunnanverðu landinu, en þá nálgast næsta lægð landið. Spár gera ráð fyrir hvassviðri nokkuð víða á landinu aðfaranótt laugardags og framan af laugardegi. Taka ber skýrt fram að þó að hvessi, þá er útlit fyrir mun skárra veður en var í veðurhamnum í gærkvöldi og í nótt.“

Veðurhorfur á landinu næstu daga

Á föstudag: Suðlæg átt 5-13 m/s. Dálítil rigning eða slydda sunnan- og vestanlands og hiti 0 til 5 stig. Þurrt og bjart á Norður- og Austurlandi með frosti á bilinu 0 til 5 stig. Hvessir af austri á sunnanverðu landinu um kvöldið.

Á laugardag: Austan 15-23 m/s framan af degi, hvassast með suðurströndinni. Norðaustan 10-18 síðdegis. Rigning eða slydda suðaustan- og austanlands, en úrkomulítið í öðrum landshlutum. Hiti yfirleitt 0 til 5 stig.

Á sunnudag: Austan 5-13 og þurrt að kalla, en slydda við austurströndina. Hiti kringum frostmark. Hvessir seinnipartinn og fer að rigna á sunnanverðu landinu með hlýnandi veðri í bili.

Á mánudag: Breytileg og síðar norðlæg átt með rigningu eða snjókomu, kólnandi veður.

Á þriðjudag: Norðlæg eða breytileg átt og snjókoma eða slydda með köflum í flestum landshlutum. Frost 0 til 5 stig, en frostlaust við suðurströndina.

Á miðvikudag: Hvöss sunnanátt með rigningu og hlýnar, en síðar vestlægari með éljum og kólnar aftur. Úrkomulítið á Austurlandi.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.