Fjögurra ára stúlka sem var saknað í meira en tvær vikur fannst á lífi

Kjartan Kjartansson skrifar 2. nóvember 2021 22:03

Cloe Smith hvarf úr tjaldi þar sem hún svaf með systur sinni um miðjan október. Lögreglan í Vestur-Ástralíu

Lögreglan í Ástralíu fann fjögurra ára gamla stúlku sem hafði verið saknað í átján daga á lífi í læstu húsi. Stúlkan hvarf af tjaldstæði í vestanverðu landinu þar sem hún var með foreldrum sínum í fríi. Karlmaður er í haldi lögreglu.

Cleo Smith hvarf sporlaust frá tjaldsvæði við strandbæinn Carnarvon á Kóralströndinni í Vestur-Ástralíu aðfaranótt 16. október. Upphófst þá umfangsmikil leit að stúlkunni á landi, lofti og á sjó.

Ástralskir fjölmiðlar sögðu frá því að mannaveiðarar hefðu tekið þátt í leitinni eftir að þeim var heitið milljón dollurum í verðlaun fyrir upplýsingar sem gætu varpað ljósi á hvarf Smith.

Breska ríkisútvarpið BBC segir að lögreglumenn hafi brotist inn í læst hús og fundið stúlkunni í Carnarvon klukkan eitt að staðartíma í nótt, um klukkan fimm síðdegis að íslenskum tíma í dag. Karlmaðurinn sem er í haldi er frá bænum. Ekki hafa verið veittar frekari upplýsingar um hann.

Smith hefur nú verið komið aftur í faðm fjölskyldu sinnar. Móðir hennar lýsti því að Cleo hefði sofið á vindsæng við hlið yngri systur sinnar í tjaldi en foreldrarnir í öðru rými í tjaldi þeirra. Þegar móðirinn vitjaði dætra sinna um morguninn hafi Cleo verið horfin og opið inn í tjaldið.

Ástralía Erlend sakamál

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.