McTominay kom Skotum til bjargar á síðustu stundu

A-riðill

Írar gerðu góða ferð til Aserbaijan og unnu öruggan 0-3 sigur en bæði lið voru án sigurs eftir fimm leiki þegar kom að leik kvöldsins.

Callum Robinson gerði tvö mörk og Chiedozie Ogbene eitt fyrir Íra sem eiga enga möguleika á að komast upp úr riðlinum.

B-riðill

Svíar áttu ekki í teljandi vandræðum með Kosovó á Friends Arena í dag en leiknum lauk með 3-0 sigri Svía þar sem Emil Forsberg kom Svíum á bragðið með marki úr vítaspyrnu í fyrri hálfleik.

Alexander Isak og Robin Quaison gerðu svo út um leikinn á síðasta hálftíma leiksins.

Í sama riðli unnu Grikkir nauman 0-1 sigur á Georgíu þar sem sigurmarkið var skorað úr vítaspyrnu í uppbótartíma.

Svíar í góðri stöðu í 2.sæti riðilsins með 12 stig eftir fimm leiki og eiga leik til góða á topplið Spánar sem hefur 13 stig.

C-riðill

Tvö neðstu lið C-riðils áttust við í Litháen þar sem heimamenn höfðu betur gegn Búlgörum með þremur mörkum gegn einu. Með þessum úrslitum er HM draumurinn fjarlægur fyrir Búlgara.

D-riðill

Úkraínumenn unnu mikilvægan útisigur í Helsinki þar sem þeir sóttu Finna heim. Andriy Yarmolenko og Roman Yaremchuk gerðu mörk Úkraínumanna í 1-2 sigri en Teemu Pukki skoraði mark Finna.

Lyftu Úkraínumenn sér þar með upp í 2.sæti riðilsins en Frakkar tróna á toppnum.

F-riðill

Skotar unnu endurkomusigur á Ísrael í Glasgow í fjörugum leik þar sem Ísraelsmenn komust í tvígang yfir á fyrsta hálftíma leiksins.

Skotar létu ekki slá sig út af laginu og unnu að lokum 3-2 sigur þar sem Scott McTominay, leikmaður Man Utd, gerði sigurmarkið þegar fjórar mínútur voru komnar fram yfir venjulegan leiktíma.