Rúnar Kristins með eina lands­liðs­markið sitt á Ís­landi í síðustu heim­sókn Armena

Íslenska karlalandsliðið í knattspyrnu tekur á móti Armeníu í undankeppni HM 2022 í Laugardalnum klukkan 18.45 í kvöld. Það þarf að fara meira en tvo áratugi aftur í tímann og inn á síðustu öld til að finna síðustu heimsókn Armena hingað til lands.

Leikurinn sem um ræðir fór fram 5. júní 1999 og íslenska liðið vann 2-0 sigur. Ríkharður Daðason og Rúnar Kristinsson skoruðu mörkin.

Ríkharður skoraði mörg mörg í Laugardalnum en þetta var aftur á móti eina landsliðsmarkið sem Rúnar Kristinsson skoraði á íslenskri grundu.

Rúnar skoraði alls þrjú mörk í 104 landsleikjum en hin mörkin komu í vináttuleik á Möltu í maí 1991. Rúnar skoraði þá tvö mörk í 4-1 sigri en síðan voru liðin meira en átta ár.

Rúnar var alls búinn að leika 56 landsleiki í röð án þess að skora þegar hann kom íslenska liðinu í 2-0 á upphafsmínútu seinni hálfleiks.

Ríkharður skoraði fyrra markið með skalla af örstuttu færi eftir hornspyrnu Þórðar Guðjónssonar. Þórður og Ríkharður léku laglega saman í aðdraganda marksins hans Rúnars en Ríkharður átti sendinguna inn í hlaupið og Rúnar skoraði með laglegu skoti í fjærhornið.

„Það var rosalega gaman að skora. Ég spilaði bakvörð lengi vel í landsliðinu undir stjórn Ásgeirs Elíassonar og fékk því ekki að fara oft framarlega á völlinn. Nú hef ég meiri mögulega. Þaö heppnaðist loksins og ég var búinn að bíða lengi eftir þessu," sagði Rúnar Kristinsson í viðtali við undirritaðan í DV eftir leikinn.

Liðið var þarna undir stjórn Guðjóns Þórðarsonar og lék þarna sinn ellefta leik í röð án þess að tapa. Þetta var jafnframt síðasti leikurinn í taplausu hrinunni því íslenska liðið tapaði á móti Rússum í Moskvu fjórum dögum síðar.

Eiður Smári Guðjohnsen, núverandi aðstoðarþjálfari íslenska landsliðsins, var valinn í hópinn fyrir leikinn en boðaði forföll vegna meiðsla. Sonur þjálfarans, Bjarni Guðjónsson, var valinn í hans stað en meiddist á æfingu daginn fyrir leik og var því ekki með heldur.

Hér fyrir neðan má sjá frétt Guðjón Guðmundssonar um leikinn en þar eru bæði mörkin sýnd.