Leiða má líkum að því að yfirlýsingin sé send út eftir að orðrómur fór af stað um að leikmaður FH hefði gerst sekur um kynferðisbrot.
Í yfirlýsingunni frá FH segir að fulltrúar félagsins hafi hitt Kolbrúnu Hrund Sigurgeirsdóttur vegna viðbragða í ofbeldismálum. Sú vinna muni halda áfram og hafi forgang innan félagsins. Kolbrún, sem er verkefnastýra jafnréttismála hjá skóla- og frístundasviði Reykjavíkur, leiðir nýjan starfshóp KSÍ sem er ætlað að halda utan um jafnréttismál hjá sambandinu.
Undir yfirlýsingu FH skrifar Viðar Halldórsson, formaður félagsins. Í samtali við Vísi í gær sagði hann að ekki væri búið að rifta samningi við neinn leikmann eða starfsmann FH.
Yfirlýsing FH
Aðalstjórn FH er mjög meðvituð um umræðuna um ofbeldis- og kynferðisbrot innan knattspyrnunnar, tekur hana alvarlega og fordæmir hvers kyns ofbeldishegðun. Fulltrúar félagsins hafa hitt ráðgjafa og fulltrúa ÍSÍ, Kolbrúnu Hrund Sigurgeirsdóttur, vegna viðbragða í þessum erfiðu málum og mun sú vinna halda áfram og hafa forgang í starfi félagsins.
f.h. Fimleikafélags Hafnarfjarðar
Viðar Halldórsson
formaður aðalstjórnar
