Innlent

Skoða að koma varan­legri Co­vid-deild á lag­girnar

Hallgerður Kolbrún E. Jónsdóttir skrifar
Svandís Svavarsdóttir, heilbrigðisráðherra, segir að verið sé að skoða að koma á laggirnar varanlegri Covid-deild á Landspítalanum. 
Svandís Svavarsdóttir, heilbrigðisráðherra, segir að verið sé að skoða að koma á laggirnar varanlegri Covid-deild á Landspítalanum.  Vísir/Vilhelm

Heilbrigðisráðherra segir að verið sé að skoða hvort hægt sé að koma á laggirnar varanlegri Covid-einingu á Landspítalanum. Sextán liggja nú inni á sjúkrahúsi með Covid-19 og Landspítalinn er á hættustigi vegna stöðu faraldursins.

„Nú erum við komin í alveg nýtt landslag þar sem við erum einmitt að feta okkur inn í það að við ætlum miklu frekar að horfa til þess hversu margir eru veikir og hversu margir eru alvarlega veikir frekar en til fjölda smita. Þetta er það sem við erum að sjá núna frá degi til dags og þessi fjöldi sem er inniliggjandi á spítalanum er áhyggjuefni,“ sagði Svandís Svavarsdóttir heilbrigðisráðherra að loknum ríkisstjórnarfundi í morgun.

„Spítalinn er að bregðast sjálfur við með því að fjölga þessum rýmum og við erum að skoða með spítalanum hvort það sé möguleiki að koma á laggirnar varanlegri Covid-einingu,“ sagði Svandís.

Erfiðasta tímabil ársins

Staðan á Covid göngudeild Landspítalans þyngist dag frá degi og er nú unnið að opnun nýrrar Covid-deildar á Landspítalanum. Þurft hefur að kalla starfsfólk úr sumarleyfum vegna álags. Runólfur Pálsson, yfirmaður Covid-göngudeildarinnar, sagði í kvöldfréttum Stöðvar 2 í gær að aukist álag áfram verði staðan illráðanleg.

„Við erum á erfiðasta tíma ársins hvað snertir mönnun vegna sumarleyfa þannig það er bara mjög erfitt. Við verðum þá að reyna að kalla fólk inn úr leyfum og við erum þegar að því en það þarf að gera það í auknum mæli. Það er ekki á vísan að róa með það,“ sagði Runólfur í gær.

Telur að auka þurfi fjármagn til spítalans

Svandís segist vel skilja að staðan sé erfið á spítalanum.

„Það er jafn erfitt fyrir spítalann eins og samfélagið allt að vera að herða og slaka á víxl þannig að við þurfum að sjá þetta fyrir okkur kannski inn í lengri framtíð sem hluta af okkar daglega lífi.“

Á kjörtímabilinu hafi Landspítalanum verið gefið aukið fjármagn og verið sé að vinna í að bæta varanlega þann mönnunarvanda sem ríki í heilbrigðiskerfinu.

„Við höfum verið á þessu kjörtímabili að auka umtalsvert fjármagn til spítalans og raunar um 14 prósent á föstu verðlagi þannig að það er umtalsverð viðbót. Þannig að spítalinn stendur betur en hann hefði staðið án þess,“ segir Svandís.

Hún telji þó að bæta þurfi fjármögnunina enn betur.

„Mín afstaða er sú að það þurfi að auka fjármögnun og bæta fjármögnun til spítalans áfram næstu ár og það þarf að stíga áfram þau skref. En svo eru aðrir þættir sem lúta ekki beint að fjármagni eins og til dæmis mönnun.“

Værum við ekki bólusett væri líklega 10 manna samkomutakmark

Styrkja þurfi hana með því að fjölga þeim sem fari í heilbrigðistengt nám.

„Það erum við að gera með sérstöku landsráði um mönnun og menntun. Þannig að við erum að taka á þessi frá ýmsum hliðum en þetta er stórt verkefni inn í framtíðina,“ segir Svandís.

Hún segir að staðan sé mun betri í dag en hún var áður en meginþorri þjóðarinnar var bólusettur. Hins vegar sé ljóst að hjarðónæmi gegn delta-afbrigðinu hafi ekki verið náð og skoða þurfi næstu skref vandlega.

„Bólusetningarnar eru að hafa gríðarlega mikil áhrif vegna þess að ef við værum ekki bólusett værum við komin í örugglega 10 manna samkomubann,“ segir Svandís.

„Samt erum við ekki að ná því markmiði með delta-afbrigðinu að ná hjarðónæmi í samfélaginu.“


Tengdar fréttir

Breyting hjá Þórólfi sem gefur boltann á stjórnvöld

Þórólfur Guðnason sóttvarnalæknir segir að óvíst sé hvort hann muni leggja til einhverjar ákveðnar aðgerðir þegar núverandi takmarkanir á samkomum renna sitt skeið á enda. Stjórnvöld þurfi að taka ákvörðun um hvort grípa eigi til harða aðgerða eða ekki til þess að koma böndum á núverandi bylgju kórónuveirufaraldursins.

Bíða eftir hver áhrif mannamóta helgarinnar verða

Víðir Reynisson, yfirlögregluþjónn hjá almannavörnum, gerir fastlega ráð fyrir því að smittölur gærdagsins verði á svipuðu róli og undanfarna daga. Hann segir að það verði áhugavert að sjá hvaða áhrif ferðalög og mannamót verslunarmannahelgarinnar muni hafa á faraldurinn.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.